Máýlen Áshimbaev: Memlekettik basqarýdaǵy olqy tustar anyqtaldy
Sondaı-aq, Senat Tóraǵasy barlyq memlekettik apparat úshin karantın naǵyz syn saǵaty bolǵanyn jetkizip, osy jaıtqa erekshe nazar aýdardy. Shyn máninde, bul kezeńde memlekettik organdardyń tıimdiligine qatysty kóptegen problemalar týyndaǵany belgili. Suhbat barysynda Máýlen Áshimbaev keıbir sheshimderdiń der kezinde qabyldanbaýyna, jekelegen memlekettik organdar men vedomstvo qyzmetkerleri kóp jaǵdaıda bir-biriniń qyzmetin qaıtalaıtynyna, kóptegen úderisterdiń eskirgenine jáne olardy tsıfrlyq formatqa aýystyratyn kez kelgenine toqtalyp ótti.
«Memlekettik apparatty ońtaılandyrý kerek. Júıeni qaıta jańǵyrtyp, bul baǵytta jańa, zamanaýı tehnologııany qoldaný qajet. Halyqqa jedel qyzmet kórsetýge, der kezinde sheshim qabyldaýǵa jáne aqparatty jetkizýge múmkindik beretin tsıfrlandyrý jumystaryn júıeli túrde júrgizgen jón. Batysta keńinen qoldanylyp, óziniń tıimdiligin dáleldegen jobalyq menedjment tásilin bizdiń memlekettik basqarý júıesine engizý kerek. Mysaly, Ulybrıtanııada Úkimet jobalyq menedjment júıesin keń aýqymda jáne maqsatqa saı qoldanady », – dedi Senat Tóraǵasy.
Sonymen qatar Máýlen Áshimbaev memlekettik qyzmetshilerdiń kadrlyq áleýetin arttyrý, jumysqa bolashaǵynan úmit kúttiretin, belsendi, bastamashyl mamandardy jumyldyrý qajet ekenine toqtalyp ótti.
Suhbat kezinde Memleket basshysy Qasym-Jomart Kemeluly Toqaevtyń jańa Joldaýynda aıtylǵan aýyl ákimderin saılaý máselesine qatysty da suraq qoıyldy.
« Ákimderdi saılaý memlekettik qyzmetke bastamashyl, belsendi azamattardy tartý úshin qolǵa alynǵan tıimdi tetikterdi biri ekeni sózsiz. Bul ákimshilik-aýmaqtyq birlikke basshylyq etetin adamdy aýyl turǵyndarynyń ózderi tańdaýyna múmkindik beredi. Atalǵan úrdis kelesi jyldan bastalatyn shyǵar. Óıkeni, Prezıdentimiz Joldaýda aldaǵy jyly birqatar ákimniń merzimi aıaqtalatynyn atap ótti », – dedi Máýlen Áshimbaev.
Senat Tóraǵasy aýyl ákimdigine óz kandıdatýrasyn usynǵysy kelgen azamattarǵa eshqandaı kedergi keltirmeı, bárine teń múmkindik berýdiń mańyzdy ekenin tilge tıek etti.
«Ákimdikke kandıdattarǵa arnalǵan bazalyq sharttardy anyqtaý kerek. Olar: azamattyǵy, bilimi jáne kásibı tájirıbesi. Bul belsendi jáne bastamashyl azamattarǵa, onyń ishinde jastarǵa saılaýǵa qatysý arqyly óz qarym-qabiletterin kórsetýge múmkindik beredi. Eger sol okrýgtiń turǵyndary kimdi laıyqty dep tanysa, sony saılaıdy. Biz bul baǵyttaǵy zań jobasyn qaraǵan kezde osy aıtylǵandardy eskeremiz», – dedi Máýlen Áshimbaev.
