Máýlen Áshimbaev medıtsına salasynyń mamandaryn 8 naýryz merekesimen quttyqtady
Sondaı-aq ol elordadaǵy kópbalaly otbasylardyń biri Toqymovtar shańyraǵyna da at basyn buryp, merekemen quttyqtap shyqty.
Astana qalalyq №1 aýrýhana shahardaǵy eń kóne medıtsınalyq mekemelerdiń biri. Negizi 1925 jyly qalanǵan. Al 2011 jyly aýrýhanaǵa 533 oryndyq arnaıy jańa ǵımarat salyndy. Sonyń nátıjesinde ol qazirgi tańda elordadaǵy zamanaýı kópsalaly klınıkalyq ortalyqtardyń birine aınalyp otyr. Munda emdelýshilerge biregeı joǵary tehnologııalyq qondyrǵylardyń kómegimen sapaly ári jedel medıtsınalyq kómek kórsetiledi.
Aýrýhana basshysy Marat Ábdýovtiń sózine qaraǵanda, mekemeniń birqatar qyzmetkerleri álemniń jetekshi klınıkalarynda biliktilikterin arttyryp, bilimderin jetildirip kelgen kásibı mamandar. Medıtsınalyq mekeme 28 klınıkalyq bólim men hırýrgııalyq, terapevtik, sondaı-aq, dıagnostıka jáne damý ortalyǵy sııaqty úsh bloktan turady. Ondaǵy álemdik brendterdiń ónimi sanalatyn eksklıýzıvti qondyrǵylar Eýropamen qatar AQSh, Japonııa sııaqty damyǵan elderden ákelingen.
Aýrýhananyń «Nur Otan» partııasynyń ıgi bastamalaryn únemi qoldap, saıası uıymmen tyǵyz baılanys ornatqanyn da atap ótken jón. Munda tipti «Nur Otan»-nyń bastaýysh partııa uıymy da jumys isteıdi. Onyń 140-qa jýyq múshesi bar. Jalpy 1100-den astam qyzmetker eńbek etetin ujymda qyz-kelinshekterdiń de sany aıtarlyqtaı kóp. Degenmen, olardyń bárine birdeı mereke kúnderi erkin demalýǵa múmkindik bola bermeıdi. Óıtkeni halyq densaýlyǵyna adal qyzmet etetin abzal jandar bul kúnderi de jumysqa shyǵyp, óz mindetterin oryndaýda.
Partııa Tóraǵasynyń Birinshi orynbasary osyndaı jumys ústindegi arýlardy arnaıy quttyqtap, olarǵa gúl shoqtaryn syılady. Sonymen qatar «Nur Otan» partııasy tóraǵasynyń birinshi orynbasary Astana qalasyndaǵy Mamandandyrylǵan balalar úıine baryp, mekeme arýlaryn merekemen quttyqtady.
Atalǵan balalar úıi 1933 jyldan beri jumys istep keledi. Al 1986 jyly «mamandandyrylǵan» sanatqa ótip, ortalyq júıke júıesinde aqaýy bar balalarǵa em-dom kórsetýge beıimdelgen. Munda jańa týǵan náresteden bastap 4 jasqa deıingi balalar tárbıelenedi. Jetimdiktiń aldyn alý jáne balanyń bıologııalyq otbasyn saqtaý maqsatynda 2012 jyly arnaıy bólim ashylǵan. Osy rette bul nysanda da «Nur Otan»-nyń bastaýysh partııa uıymy jumys isteıtinin atap ótken jón.
Mekemeniń qyz-kelinshekterin merekemen quttyqtaǵan Máýlen Áshimbaev elimizde Elbasynyń tapsyrmasymen áleýmettik salany damytýǵa baǵyttalǵan aýqymdy jumystar atqarylyp jatqanyn aıtty. Sondaı-aq ol partııa tarapynan da bul baǵytta kóptegen ıgi ister qolǵa alynǵanyn jáne taıaýda ótken kezekti XVIII sezde qabyldanǵan 2030 jylǵa deıingi jańa baǵdarlamada da áleýmettik salaǵa basymdyq berilgenin tilge tıek etti.
«Balalar men jetimderge jaǵdaı týǵyzý bul qoǵam damýynyń kórsetkishi. Osy arqyly memleketimizdiń damýy men áleýmettik baǵdary jaıynda senimdi túrde aıta alamyz. Bizdiń partııa otbasylarǵa, áıelder men balalarǵa asa qatty mán beredi. Partııanyń jáne ózimniń atymnan balalarǵa bólip otyrǵan mahabbat pen meıirimińiz úshin Sizderge alǵys aıtamyn. Tárbıelep otyrǵan balalardyń Sizderdi mama dep ataıtynyna kýá bolyp otyrmyz. Sizder óte mańyzdy jumysty atqaryp júrsiz, - dedi Máýlen Áshimbaev mekeme qyzmetkerlerine.
Qazirgi tańda elimizde kópbalaly otbasylarǵa qoldaý kórsetý jumystary erekshe ekpinmen júrgizilip jatqany belgili. Soǵan oraı Máýlen Áshimbaev bas qaladaǵy sondaı otbasylarynyń birine arnaıy bardy.
Toqymovtar otbasynda 6 bala bar. Onyń tórteýi qyz bala. Olardyń aldy aıaqtanyp, otaý qursa, kenjeleri 9 jasta. Otaǵasy Jánibek Serikuly Qazaqstan Respýblıkasynyń Qarýly Kúshterinde eńbek etken. Búginde zeınet demalysynda. Al bar ǵumyryn bala tárbıesi men úı sharýasyna arnaǵan Maıra Qostaýbaıqyzy «Kúmis alqa» ıegeri. Bir qyzyǵy, Maıra Qostaýbaıqyzynyń ózi de kópbalaly otbasynan shyqqan. Onyń anasy Nurıla Jetpisqyzy «Altyn alqa» ıegeri.
Áýlettegi áıel azamattardy kóktemniń shýaq shashar merekesimen quttyqtaǵan «Nur Otan» partııasy tóraǵasynyń birinshi orynbasary partııa tarapynan kópbalaly otbasylarǵa qoldaý kórsetýge arnalǵan bastamalar jaıynda aıtyp, Elbasy tapsyrmasymen «Baqytty otbasy» jobasy qolǵa alynǵanyn jetkizdi.
