Máýlen Áshimbaev Máskeýde qazaqstandyq stýdenttermen kezdesti
Sondaı-aq ol sapar barysynda ultymyzdyń bas aqyny Abaı Qunanbaıulynyń eskertkishine gúl shoǵyn qoıdy jáne Reseı Federatsııasy Memlekettik Dýmasynyń Tóraǵasy Vıacheslav Volodınmen kezdesti.
Stýdenttermen kezdesýde Máýlen Áshimbaev is-sharanyń Qazaqstandaǵy Ǵylym qyzmetkerleri kúnimen tuspa-tus kelgenine nazar aýdardy. Ol talantty, bilimdi jastar elimizdi jańǵyrtýdyń draıveri jáne Ádiletti Qazaqstan qurý jolyndaǵy mańyzdy kúshterdiń biri bolýǵa tıis ekenin aıtty. Sol sebepti Qazaqstanda sapaly bilim máselesine basa mán berilip, bul baǵytta júıeli jumys júrgizilip keledi.
Sondaı-aq Senat Spıkeri qańtar oqıǵasy jastar saıasatyna qatysty olqylyqtardy aıqyn kórsetip bergenin aıtyp, búginde Qazaqstanda Memleket basshysynyń bastamasymen qolǵa alynǵan aýqymdy reformalardyń iske asyrylý barysyna toqtaldy.
«Prezıdentimiz Qasym-Jomart Kemeluly Toqaev VIII shaqyrylǵan Parlamenttiń birinshi sessııasynda ókildi bılik tarmaǵyna jas saıasatkerlerdiń jańa býyny kelip jatqanyn atap ótti. Olar qoǵamda jańa qundylyqtardyń keńinen dáriptelýine áser etýge tıis. Sońǵy jyldary jastardy memlekettik basqarý salasyna jumyldyrý jáne olardyń azamattyq áleýetin arttyrý úshin birqatar joba qolǵa alynyp, tıisti zańdarǵa túzetýler engizildi. Senat janynda zań jobalaryn saraptaýǵa jáne Parlament fýnktsııalaryn iske asyrýǵa jas sarapshylardy tartýǵa arnalǵan qoǵamdyq jobalar qolǵa alynǵan. Olar – Senat janyndaǵy Jas sarapshylar klýby men Taldaý mektebi. Sizderdi osy jobalarǵa qatysýǵa shaqyramyz», – dedi Máýlen Áshimbaev.
Kezdesýde álemdegi búgingi syn-qaterler men jas urpaqtyń olarǵa qarsy turý máselesi de áńgimege arqaý boldy.
Sondaı-aq Palata Tóraǵasy ótken ǵasyrdyń 60-jyldarynda Máskeýdegi joǵary oqý oryndarynda oqyǵan qazaqtyń bolashaq ǵalymdary men kórnekti qoǵam qaıratkerleri birneshe býynnyń basyn qosqan «Jas tulpar» birlestigin qurǵanyn aıtty.
«Birlestiktiń basty maqsaty qazaqtyń mádenıetin, rýhanııatyn, ónerin jáne ádebıetin dáripteý edi. Oǵan belgili ǵalym Murat Áýezov, ǵalym-demograf Maqash Tátimov, Qazaqstandaǵy molekýlalyq bıologııanyń negizin qalaýshy Murat Aıtqojın sııaqty iri tulǵalarymyz múshe boldy. Basqa da kóptegen belgili azamattarymyz osy qalada bilim alǵan kezde birlestik qatarynda bolyp, belsendilik tanytty. Sizder de osyndaı ıgi dástúrdi laıyqty jalǵastyryp, alǵan bilimderińizdi elimizdiń damýyna jumsaısyzdar dep senemiz», – dedi Máýlen Áshimbaev.
Sonymen qatar Senat Spıkeri Reseı Memlekettik Dýmasynyń Tóraǵasy Vıacheslav Volodınmen kezdesti. Máýlen Áshimbaev reseılik áriptesine bıyl 19 naýryzda ótken Qazaqstan Parlamenti Májilisi depýtattarynyń saılaýyna halyqaralyq baıqaýshy retinde belsendi qatysyp, saıası naýqandy obektıvti baǵalaǵany úshin alǵys bildirdi. Senat Spıkeri saılaý el Prezıdenti Qasym-Jomart Toqaev bastamashylyq etken saıası reformalar aıasynda ótkenin, osylaısha Qazaqstannyń tutas saıası júıesin qaıta jańǵyrtýdy kózdegen úlken saılaý tsıkli aıaqtalǵanyn aıtty. Odan bólek, suhbat kezinde Memlekettik Dýma depýtattarymen saýda-ekonomıkalyq, ınvestıtsııalyq, mádenı-gýmanıtarlyq jáne ózge de salalardaǵy ekijaqty yntymaqtastyqtyń quqyqtyq bazasyn jetildirý jónindegi ózara is-qımyl perspektıvalaryn talqylandy.
