Máýlen Áshimbaev Mańǵystaýdaǵy qýańshylyq týraly: Úkimettiń rezervi paıdalanylady
«Senatorlardyń óńirlerdegi jumysy jalǵasýda. Osyǵan oraı Mańǵystaý oblysyna keldim.
Qazirgi tańda óńirdegi qýańshylyq bárimizdi alańdatyp otyr. Mal shyǵyny da tirkelgeni belgili. Sapar barysynda óńir basshylyǵymen, sondaı-aq, jurtshylyqpen kezdesip, osy jáne ózge de ózekti máselelerdi talqyladyq.
Bul jaǵdaı Memleket basshysynyń baqylaýynda. Prezıdentimiz jýyrda ǵana ótken Úkimettiń keńeıtilgen otyrysynda tıisti organdar men ákimdikterge naqty tapsyrmalar berdi.
Soǵan sáıkes qıyndyqqa tap bolǵan sharýalarǵa júıeli qoldaý kórsetiledi. Naqty aıtqanda, sharýashylyqtardy jem-shóppen qamtamasyz etý úshin Úkimettiń rezervi paıdalanylady. Qosymsha sýbsıdııalar beriledi. Tótenshe shara retinde erekshe qorǵalatyn tabıǵı aýmaqtardan shóp jınaý múmkindigi qarastyrylady. Prezıdent jem-shóptiń ishki naryqta jetkilikti bolýy úshin ony shetke shyǵarýdy ýaqytsha toqtata turýdy da tapsyrdy. Bul jaǵdaıdy ońaltý jolyndaǵy mańyzdy sheshim ekeni sózsiz. Qýańshylyq - tabıǵı jáne qaıtalanyp otyratyn qubylys. Sondyqtan jedel sharalarmen qosa keshendi is-qımyl algorıtmin ázirleý de mańyzdy. Jıynda Memleket basshysy osyndaı naqty mindetterdi júktedi. Búgingi sapar barysynda osy máselelerge basa mán berip, Prezıdentimizdiń tapsyrmalaryn óńirde iske asyrý barysyna nazar aýdardyq», - dep jazdy Máýlen Áshimbaev.
Sonymen qatar, ol sapar barysynda «Kaspıı» sý tuşytý zaýytynyń jumysymen tanysty. «Mańǵystaýda taza aýyz sý máselesi óte ózekti ekeni kópshilikke málim. Ony sheshý úshin osyndaı nysandardyń mańyzy zor. Sapar aıasynda balyq jáne nan zaýyttarynyń qyzmetkerlerimen de kezdesip, Memleket basshysynyń jańǵyrý baǵdary men qabyldanǵan zańdardyń mańyzyna toqtaldyq.
Sondaı-aq, búgin Ábish Kekilbaıuly atyndaǵy Mádenı ortalyqqa arnaıy at basyn burdym. Qabyrǵaly qalamger ári qaıratker Ábish aǵamyzdyń ult tarıhyndaǵy orny erekshe. Sondyqtan, ol kisiniń esimin ulyqtaý, baı ádebı murasyn dáripteý - barshamyz úshin abyroıly mindet», - dep tolyqtyrdy M. Áshimbaev.
