Máýlen Áshimbaev Qyrǵyzstan Prezıdenti Sadyr Japarovpen kezdesti
Kezdesý barysynda Senat tóraǵasy bizdiń elimiz Qyrǵyz Respýblıkasymen jan-jaqty yntymaqtastyqty odan ári nyǵaıtýǵa múddeli ekenin atap ótti.
Máýlen Áshimbaev ózara baılanysty arttyrýǵa barlyq deńgeıdegi, birinshi kezekte, eki eldiń memleket basshylary arasyndaǵy belsendi jáne senimdi saıası dıalogtyń yqpaly zor ekenin aıtty.
Óz kezeginde Sadyr Japarov Qazaqstan men Qyrǵyzstan arasyndaǵy túrli alańdaǵy ekijaqty jáne kópjaqty yntymaqtastyqtyń joǵary deńgeıin tilge tıek etti.
Osy qarym-qatynasty barlyq baǵytta, onyń ishinde eki eldiń Parlamentteri arqyly saqtaý jáne odan ári nyǵaıtýdyń mańyzdy ekeni sóz boldy.
Sonymen qatar qazaqstandyq senatorlar Shyńǵys Aıtmatovtyń 95 jyldyǵyna arnalǵan VII qazaq-qyrǵyz forýmyna qatysty.
Aýqymdy is-sharaǵa qatysýshylar qatarynda Qazaqstan men Qyrǵyzstannyń aqyn-jazýshylary, tarıhshylary jáne Aıtmatovtyń shyǵarmashylyǵyn zertteýshi ǵalymdar bar.
Óz sózinde senator baýyrlas halyqtardyń mádenı-gýmanıtarlyq baılanysyn damytýda eki eldiń zııaly qaýym ókilderi mańyzdy ról atqaratynyn atap ótti.
«Qazaq-qyrǵyz qarym-qatynasynyń tarıhy tereńnen tamyr tartady. Biz ejelden irgeles qonǵan, tarıhymyz da, dástúrimiz de bir baýyrlas halyqpyz. Bizdiń mádenıetimiz de, tilimiz de, dinimiz de ortaq. Shyn máninde, qazaqqa qyrǵyzdan jaqyn halyq joq. Osyndaı dostyǵymyz ben baýyrlastyǵymyzdy odan ári arttyrý asa mańyzdy. Eki eldiń Prezıdentteri Qasym-Jomart Kemeluly Toqaev pen Sadyr Nurǵojauly Japarovtyń tapsyrmalaryna sáıkes ekonomıkalyq, áleýmettik, mádenı-gýmanıtarlyq jáne basqa da salalar boıynsha yntymaqtastyqty nyǵaıtýǵa arnalǵan naqty sharalar qolǵa alynyp jatyr», – dedi Máýlen Áshimbaev.
Senat spıkeri qazaq pen qyrǵyzǵa birdeı ortaq tulǵa, uly jazýshy Shyńǵys Aıtmatovtyń shyǵarmashylyǵyna da erekshe toqtaldy.
Áıgili qalamgerge «Qazaqstannyń halyq jazýshysy» ataǵy berilgenin jáne Qazaqstanda birqatar kóshe onyń esimimen atalǵanyn áńgimege arqaý etti.
Qaıratkerdiń ǵıbratty ǵumyryn dáripteý maqsatymen basqa da aýqymdy mádenı is-sharalar men shyǵarmashylyq keshter ótkizilip turatynyn jetkizdi.
«Adamzattyń Aıtmatovy atanǵan qalamger óz shyǵarmalaryna qazaqtyń keń dalasyn jáne onda ótken oqıǵalardy da arqaý etkenin bilemiz. Jazýshynyń qalamynan týǵan «Aq keme», «Janpıda», «Ǵasyrdan da uzaq kún» sııaqty shyǵarmalar álemdik ádebıettiń altyn qoryna qosylǵan qundy qazyna ekeni daýsyz. Atalǵan týyndylarda adamı qundylyq keńinen kórinis tapqan. Shyn máninde, Aıtmatov tulǵasy men shyǵarmashylyǵy – qazaq-qyrǵyz baılanysynyń rýhanı kópiri», – dedi Máýlen Áshimbaev.
Senat tóraǵasy forým barysynda aıtylǵan pikirler men usynystar aldaǵy jumysta eskeriletinin de nazardan tys qaldyrmady.
Birtýǵan eki eldiń qarym-qatynasyn nyǵaıtýǵa úlken úles qosqan jáne qosyp júren qyrǵyz zııalylaryna Qazaqstan Prezıdenti Qasym-Jomart Toqaevtyń atynan alǵys bildire otyryp, qyrǵyzstandyq birqatar qaıratkerge bizdiń elimizdiń memlekettik nagradalaryn tapsyrdy.
Qyrǵyz eline sapar aıasynda senatorlar qazaqtyń uly oıshyly, aqyn Abaı Qunanbaıulynyń eskertkishine arnaıy baryp, ǵulamanyń rýhyna taǵzym etti.
Foto: senate.parlam.kz
