Máýlen Áshimbaev Qostanaı oblysynda «Nur Otan» partııasynyń múshelerimen kezdesti
Baspasóz málimetterine qaraǵanda, sapar barysynda Máýlen Áshimbaev partııanyń «Sokolov-Sarybaı taý-ken baıytý óndiristik birlestigi» AQ» aýdandyq fılıalyna qarasty bastaýysh partııa uıymdarynyń tóraǵalarymen jáne kásiporynnyń eńbek ujymymen kezdesti. Sondaı-aq partııa qyzmetin jańǵyrtý aıasynda qolǵa alynǵan jańa jobalardyń aımaqta júzege asyrylý barysymen tanysyp, partııanyń oblystyq aktıvimen jıyn ótkizdi.
Odan bólek, «Rýhanı jańǵyrý» baǵdarlamasy boıynsha óńirlik jobalaý keńsesinde boldy jáne oblys ákimi, partııa oblystyq fılıalynyń tóraǵasy Arhımed Muhambetovpen birge «7-20-25» baǵdarlamasy boıynsha baspanaly bolǵan jergilikti turǵyndarǵa páter kiltin tapsyrdy.
Elbasynyń partııa Saıası keńesiniń keńeıtilgen otyrysynda bergen tapsyrmasy boıynsha sońǵy aılarda partııa qyzmetin jańǵyrtý jumystary qarqyndy júrgizilip jatqany belgili. Birqatar tyń jobalar qolǵa alynyp, jańa bastamalar júzege asyrylýda. Sonyń ishinde bastaýysh partııa uıymdarynyń rólin kúsheıtý isi de bar. Búginde elimiz boıynsha «Nur Otannyń» 6 myńǵa jýyq bastaýysh partııa uıymy bar. Bir mıllıonnan astam nurotandyqtar osy uıymdarǵa toptastyrylǵan. Bıyl atalǵan uıymdardyń jumysyn jandandyrý maqsatynda partııa tarıhynda alǵash ret elimizdiń tórt aımaǵynda arnaıy forýmdar ótkizildi.
Onda qatysýshylar BPU qyzmetterin odan ári jandandyrýǵa baǵyttalǵan tujyrymdamaǵa engizý úshin óz usynystary men pikirlerin bildirdi. Eń iri jáne belsendi bastaýysh partııa uıymdarynyń músheleri qarasha aıynda Astanada ótetin respýblıkalyq forýmǵa qatyspaq. Onda tujyrymdama jan-jaqty talqylanyp, sońǵy nusqasy qabyldanady dep kútilýde.
Máýlen Áshimbaev partııanyń «Sokolov-Sarybaı taý-ken baıytý óndiristik birlestigi» AQ» aýdandyq fılıalyna qarasty bastaýysh partııa uıymdarynyń basshylyǵymen kezdesýinde osy máselelerge erekshe nazar aýdardy. Atalǵan fılıal 2007 jyldyń sáýir aıynda qurylǵan. Búginde ol músheleriniń sany jaǵynan Qostanaı oblysynda eń iri fılıal bolyp sanalady. Munda qazirgi kezde 20 myńnan astam partııa múshesi jáne 31 bastaýysh partııa uıymy bar. Máýlen Áshimbaev kezdesýde bastaýysh partııa uıymdary jergilikti jerlerdegi barlyq partııalyq jumystyń negizgi ortalyǵy bolýy kerektigin aıtty.
«Partııalyq jańǵyrý aıasyndaǵy basym baǵyttarymyzdyń biri - bastaýysh partııa uıymdaryn jandandyryp, olardyń jumys tıimdiligin arttyrý. Soǵan oraı Pavlodar, Shymkent, Qaraǵandy jáne Aqtóbe qalalarynda atalǵan uıymdardyń aımaqtyq forýmdaryn ótkizdik. Onda uıym ókilderi partııalyq jańǵyrýǵa qatysty óz oılaryn aıtyp, túrli usynystaryn joldady. Onyń barlyǵy aldaǵy qarasha aıynda Astanada ótetin respýblıkalyq forýmda keńinen talqylanyp, pysyqtalady. Jalpy biz bastaýysh partııa uıymdarynyń jumysyn qashanda joǵary baǵalaımyz. Sebebi, bul uıymdar halyqtyń tikeleı ortasynda júrip, saılaýshylarmen tyǵyz baılanysta jumys isteıdi. Sondyqtan Elbasy, partııa Tóraǵasynyń aldymyzǵa qoıǵan mindetterin júzege asyrýda Sizderge úlken jaýapkershilik júkteletini sózsiz. Sol maqsattarǵa jetý úshin árqaısymyz belsendi jumys isteıik», - dedi Máýlen Áshimbaev.
Sonymen qatar partııa Tóraǵasynyń Birinshi orynbasary atalǵan fılıaldyń jumysyna rızashylyǵyn bildirip, aldaǵy mindetterge de nazar aýdardy.
«Elbasynyń tapsyrmasy boıynsha biz partııa qyzmetin jańǵyrtý arqyly elimizdiń zamanaýı, tıimdi, joǵary tehnologııaly saıası uıymy retinde qalyptasýymyz kerek. Búkil álem ózgeristerge ushyraǵan kezeńde biz de qazirgi zamannyń úrdisterine beıimdelýge tıispiz. Jaqtastarymyzǵa óz ıdeıalarymyzdy túsindirýde jańa tásilderdi qoldanyp, ozyq halyqaralyq tájirıbelerdi eskerýimiz qajet. Sol arqyly Elbasynyń senimdi saıası tiregi jáne elimizdiń jetekshi saıası kúshi bolyp qalýymyz kerek, - dedi Máýlen Áshimbaev.
Sondaı-aq ol Elbasynyń barlyq baǵdarlamalary men bastamalary partııanyń basty mıssııasy bolyp sanalatynyn aıtyp, «Nur Otannyń» osy baǵyttaǵy jumysyn tilge tıek etti.
Máýlen Áshimbaevtyń aıtýynsha, partııa «Tsıfrly Qazaqstan», «Rýhanı jańǵyrý» baǵdarlamalarynyń júzege asyrylýy men shaǵyn jáne orta bıznesti damytýǵa úles qosý maqsatynda birqatar tyń jobalardy tabysty júzege asyrýda.
Elbasy Saıası keńes otyrysynda «Rýhanı jańǵyrý» baǵdarlamasy «Nur Otannyń» ıdeologııalyq platformasy bolýy kerektigin aıtqan bolatyn. Sondyqtan atalǵan baǵdarlamanyń partııa úshin mańyzy joǵary. Osyǵan oraı Máýlen Áshimbaev Qostanaı oblysyndaǵy «Rýhanı jańǵyrý» baǵdarlamasyn júzege asyrý jónindegi óńirlik jobalyq keńsesiniń jumysymen arnaıy tanysty.
