Máýlen Áshimbaev: Konstıtýtsııalyq reformamen Qazaqstan tarıhynda jańa dáýir bastaldy

ASTANA. QazAqparat - Búgin qol qoıylǵan zańdar Ádiletti Qazaqstan qurýdyń berik quqyqtyq irgetasy ekeni sózsiz. Mundaı pikirdi Senat tóraǵasy Máýlen Áshimbaev bildirdi, dep habarlaıdy QazAqparat.

«Búgin Memleket basshysy Qasym-Jomart Kemeluly Toqaev maýsym aıynda ótken respýblıkalyq referendýmnyń nátıjesin iske asyrý úshin qabyldanǵan birqatar zańǵa jarııa túrde qol qoıdy. Olardyń qatarynda «Konstıtýtsııalyq Sot týraly», «Adam quqyqtary jónindegi ýákil týraly», «Prokýratýra týraly» sııaqty konstıtýtsııalyq zańdar bar.

Osylaısha, bılik tarmaqtary arasyndaǵy baılanystyń jańa úlgisin qalyptastyrýǵa jáne memleket basqarý isine azamattardyń qatysýyna jol ashýǵa múmkindikter týyp otyr. Sondaı-aq, adam quqyqtary men bostandyqtaryn qorǵaý júıesi nyǵaıa tústi.

Prezıdentimiz atap ótkendeı, konstıtýtsııalyq reforma Qazaqstan tarıhynda jańa dáýir bastalǵanyn aıqyndaıdy. Bul qadamdar sońǵy úsh jyldaǵy saıası ózgeristerdi ornyqtyryp, memleketimizdi odan ári nyǵaıtý úshin myqty negiz qalady», - dep jazdy Senat tóraǵasy jelidegi paraqshasynda.

Onyń aıtýynsha, shyn máninde, búgin qol qoıylǵan zańdar Ádiletti Qazaqstan qurýdyń berik quqyqtyq irgetasy ekeni sózsiz.

«Aldaǵy ýaqytta Parlament Senaty ádilettilik qaǵıdatyna taban tireı otyryp, zańnamalyq jumystardy jalǵastyra beredi», - dedi M. Áshimbaev.

Foto: senate.parlam.kz