Máýlen Áshimbaev: Kelesi jyly din týraly zańǵa ózgeristerdi engizý máselesine oralý kerek bolady
ASTANA. 26 qazan. QazAqparat - Aldaǵy jyldyń aıaǵyna qaraı din týraly zańǵa ózgeristerdi engizý máselesine oralý kerek bolady. Búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda Májilis depýtaty, Palatanyń Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev osylaı aıtty.
Ótken jyldary «Dinı qyzmet jáne dinı birlestikter týraly» zańy qabyldanǵanyna toqtalǵan depýtat, «Dinı birlestikterdi retteýge negizdelgen zań qabyldanǵan kezde túrli áńgimeler men synı kózqarastar bolǵanyn bilemiz. Qazirgi kezde osy zań eldiń ishindegi turaqtylyqty qamtamasyz etýge, qaýipsizdikti saqtaýǵa tikeleı áserin tıgizdi»,-dedi. Osy oraıda ol atalǵan zańnamany júzege asyrý úshin Din isteri jónindegi agenttigi men tıisti memlekettik organdar jáne uıymdar aýqymdy jumystar atqarǵandyǵyn jetkizdi. «Bul zań óziniń kerektigin ári durystyǵyn dáleldep berdi. Biraq, ýaqyt ótken saıyn jańa máseleler týyndaıtyny belgili. Zań - ol qatyp qalǵan dúnıe emes qoı, degenmen de zańdy da kúnde ózgertýge bolmaıdy. Sondyqtan keshe din máselesi boıynsha ózimizdiń komıtette áriptesterimizben talqyladyq. Qazirgi kezde Úkimet tarapynan osy zańǵa ózgerister engizý kerek shyǵar degen pikirler bar. Osyǵan baılanysty eldiń ishindegi jáne syrtyndaǵy úrdisterdi eskerip, jaǵdaıdy túsinip, tıisti saraptaý jumystaryn júrgizý qajet. Múmkin kelesi jyldyń ortasynda nemese aıaǵyna qaraı osy zańǵa taǵy da qaıtyp kelý kerek bolatyn shyǵar»,-dedi M. Áshimbaev. Óz sózinde halyq qalaýlysy bul baǵytta álemde bolyp jatqan úrdisterden sabaq alyp, zerdelegennen keıin ǵana, zańǵa ózgerister engizý kerek ekenin atap ótti.
