Máýlen Áshimbaev: «Kedergisiz keleshek» partııalyq jobasy edáýir ózgeretin bolady
«Nurly júrek» múgedek balalarǵa áleýmettik qyzmet kórsetý ortalyǵy men «Qasıetti jol» ońaltý ortalyǵyna arnaıy barǵan olar atalǵan mekemelerdiń jumys barysymen tanysyp, osy baǵyttaǵy ıgi bastamalardyń jaı-kúıine nazar aýdardy. «Nur Otan» partııasy Elbasy, partııa Tóraǵasynyń tapsyrmasymen múmkindigi shekteýli jandarǵa únemi jan-jaqty qoldaý kórsetip keledi. Osy baǵytta arnaıy «Kedergisiz keleshek» partııalyq jobasy da jumys isteıdi. Elordamyzdaǵy áleýmettik nysandardyń jumysymen tanysqan «Nur Otan» partııasy Tóraǵasynyń Birinshi orynbasary aldymen «Nurly júrek» áleýmettik qyzmet kórsetý ortalyǵyna keldi. Búginde munda 3-18 jas aralyǵyndaǵy 260 bala men jasóspirim áleýmettik beıimdelý jáne ońaltý baǵytynda em-dom qabyldaýda. Ortalyqta balalarmen bilikti mamandar jumys isteıdi. Mekeme basshysy Serik Bópejanovtyń aıtýynsha, munda qajetti medıtsınalyq terapııa men korrektsııa qyzmetteri joǵary deńgeıde kórsetiledi. Sondaı-aq, bul jerde túrli taqyrypqa arnalǵan úıirmelerdiń jumysy da júıeli jolǵa qoıylǵan. «Ortalyq tárbıelenýshileri qaladaǵy teatr, kórme, kontsertter sııaqty mádenı is-sharalarǵa jıi baryp turady», - deıdi S.Bópejanov. Sonymen qatar, Máýlen Áshimbaev bastaǵan nurotandyqtar «Qasıetti jol» ońaltý ortalyǵynda boldy. Bul jerde 2-15 jas aralyǵyndaǵy múgedek balalar men jasóspirimderdiń tegin ońaltý kýrsynan ótýine barlyq jaǵdaı jasalǵan.
«Qasıetti jol» qoǵamdyq qaıyrymdylyq qorynyń prezıdenti Gúlmıra Ábildınovanyń sózine qaraǵanda, ázirge elimiz boıynsha osyndaı úsh ońaltý ortalyǵy bar. Onyń ekeýi - Astanada, bireýi Shymkent qalasynda ornalasqan.
"Endigi bizdiń maqsatymyz - elimizdiń ár óńirinde osyndaı ortalyqtar ashyp, balalarǵa kómek qolyn sozý. Bul máselede barlyǵyn memlekettiń moınyna artyp qoımaı, belsendi azamattar ózderi de bas bolyp, iske kirisý kerek dep esepteımin. Biz osy maqsatta «Qazaqstan jaqsylyq jasaıdy» atty arnaıy bastamany qolǵa aldyq. Sol arqyly kez kelgen qazaqstandyq jylyna bir ret 365 teńgesin qaıyrymdylyqqa jumsaı alady. ıAǵnı, kúnine bar bolǵany bir teńgeden osy baǵytta qaıyrymdylyqqa jumsap otyrsa, osyndaı 40 ońaltý ortalyǵyn ashýǵa múmkindik týar edi", - degen G.Ábildınova barsha qazaqstandyqtardy atalǵan bastamaǵa belsene atsalysýǵa shaqyrdy. Ol úshin arnaıy «Qazaqstan jaqsylyq jasaıdy» atty mobıldi qosymsha da iske qosylǵan. ıAǵnı, aktsııaǵa qatysqysy kelgen azamattar sol jerden barlyq qajetti málimetterdi ala alady. 
Áleýmettik nysandardyń eńbek ujymymen jáne ondaǵy tárbıelenýshilerdiń ata-analarymen kezdesken partııa Tóraǵasynyń Birinshi orynbasary partııa qyzmetin jańǵyrtý aıasynda «Kedergisiz keleshek» jobasynyń jumysy da odan ári jandanyp, ádis-tásilderi jetile túsetinin aıtty. -
"Erekshe qajettiligi bar múmkindigi shekteýli jandarǵa qoldaý kórsetip, qol ushyn sozý - partııamyzdyń basym baǵyttarynyń biri. Osyǵan oraı «Kedergisiz keleshek» partııalyq jobasyn jandandyryp, formatyn ózgertip, bul baǵytta birneshe naqty jumystardy qolǵa aldyq. Osy sanattaǵy azamattarymyzdyń negizgi máselelerin saraptap, partııa tarapynan olarǵa jan-jaqty qoldaý kórsetý úshin negizgi úsh baǵyt boıynsha jumys júrgizý kerektigin anyqtadyq. Olar: ınklıýzıvti bilim berý, múmkindigi shekteýli jandardy jumyspen qamtýǵa jaǵdaı jasaý jáne qoǵamdyq oryndarda «kedergisiz orta» qalyptastyrý", - dedi Máýlen Áshimbaev.
Sondaı-aq, «Nur Otan» partııasy Tóraǵasynyń Birinshi orynbasary osy saladaǵy birqatar máselelerge de nazar aýdardy. Onyń sózine qaraǵanda, qazirgi tańda elimizde múmkindigi shekteýli jandardyń 30 paıyzy ǵana jumys istep, aqsha tabý múmkindigine ıe. Sondyqtan Máýlen Áshimbaev bul ózekti máseleni sheshý úshin jumys berýshilermen birlesip, júıeli jumys isteý kerektigin aıtty. Budan basqa, múmkindigi shekteýli jandarǵa arnalǵan ınfraqurylymnyń qoljetimsizdigi de ózekti máselelerdiń qatarynda. Máselen, búginde 31 myńnan astam pasporttalǵan ınfraqurylym nysandarynyń 3 myńǵa jýyǵy múmkindigi shekteýli jandar úshin qoljetimsiz. Odan bólek, elimizde ınklıýzıvti bilim berý isi de laıyqty deńgeıde damymaı otyr. Ázirge otandyq mektepterdiń tek 30 paıyzynda ǵana múmkindigi shekteýli balalardy oqytýǵa qajetti jaǵdaı jasalǵan.
"Partııa Tóraǵasynyń tapsyrmasy boıynsha biz aldaǵy ýaqytta bul máselelerdi basty nazarymyzda ustaıtyn bolamyz. Keleshekte osy úsh baǵyt boıynsha júıeli jumys isteımiz. Jańǵyrtylǵan jobanyń basty maqsaty - múmkindigi shekteýli jandardyń ómir sapasyn jaqsartyp, olarǵa partııa tarapynan naqty kómek kórsetý", - dedi Máýlen Áshimbaev.
Bul rette búginde elimizde keıbir úkimettik emes uıymdardyń óz kúshterimen aýqymdy jumystar atqaryp otyrǵanyn da atap ótken jón. Osyǵan oraı keleshekte partııa sondaı uıymdardyń bastamasyna jan-jaqty qoldaý kórsetip, olarmen birlesip jumys isteıtin bolady.
"Jalpy kez kelgen qoǵamnyń damý deńgeıin anyqtaıtyn tetikterdiń biri retinde múmkindigi shekteýli jandarǵa jasalǵan jaǵdaı men qarym-qatynasty aıtýǵa bolady. Osy turǵydan kelgende elimizde aýyz toltyryp aıtarlyqtaı jumystar istelip, kóptegen ıgi bastamalar júzege asyrylýda. Árıne birqatar kem tustar da bar. Aldaǵy ýaqytta partııa sol olqylyqtardyń aldyn alý úshin memlekettik organdarmen jáne úkimettik emes uıymdarmen birlesip jumys istep, ózara yntymaqtastyqty odan ári kúsheıtetin bolady. Atap aıtqanda, biz partııa janynan úkimettik emes uıymdarmen jumys isteıtin arnaıy Keńes quramyz. Olardyń partııanyń portaly arqyly bizge óz jobalaryn usynýlary úshin jaǵdaı jasaımyz. Sol jobalardy saraptap, áleýmettik mańyzy bar degenderine qoldaý kórsetý úshin jumys isteımiz", - dedi Máýlen Áshimbaev.
