Máýlen Áshimbaev Qazaqstan men EQYU yntymaqtastyǵyn damytý máselelerin talqylady

NUR-SULTAN. QazAqparat - Senat Spıkeri Máýlen Áshimbaev Eýropadaǵy qaýipsizdik jáne yntymaqtastyq uıymy Nur-Sultan qalasyndaǵy Baǵdarlamalar keńsesiniń basshysy Folker Frobartpen kezdesip, Qazaqstan men EQYU arasyndaǵy yntymaqtastyqty damytý máselelerin talqylady, dep habarlaıdy QazAqparat.

Kezdesý barysynda palata Tóraǵasy elimizde Memleket basshysynyń bastamasymen iske asyrylyp jatqan mańyzdy saıası reformalar jóninde aıtyp ótti. Sonyń ishinde, saılaý týraly zańnamalarǵa engiziletin ózgeristerge keńinen toqtaldy.

«Bıylǵy 15 qańtarda Parlamenttiń jańa shaqyrylymynyń sessııasy ashyldy. Sol jıynda Prezıdentimiz Qasym-Jomart Toqaev birqatar saıası bastamalardy usyndy. Naqty aıtqanda, saıası partııalardyń Parlament Májilisine jáne máslıhattarǵa ótý shegin 7 paıyzdan 5-ke deıin tómendetý usynyldy. Sondaı-aq, saılaý bıýlletenderine «Bárine qarsymyn» degen jazýdy qosý máselesi kóterildi. Qazirgi tańda tıisti zań jobasyn Senat qarap jatyr», – dedi Máýlen Áshimbaev.

Sonymen qatar suhbattasýshylar halyqaralyq máselelerge de nazar aýdardy. Soǵan sáıkes kezdesý kezinde Ortalyq Azııa elderiniń ózara qarym-qatynasyn damytý jáne Aýǵanstandy qalpyna keltirý máseleleri talqylandy. Odan bólek, áńgime barysynda eki jaq óńirde sý resýrstaryn paıdalaný, onyń ishinde, Aral teńiziniń ekologııalyq ahýaly jaıynda sóz qozǵady.

«Aral teńiziniń qazirgi ahýaly Ortalyq Azııa elderindegi mıllıondaǵan turǵynnyń ómir súrý sapasyna keri áserin tıgizip otyr. Bizdiń elderimiz halyqaralyq uıymdarmen birlesip, Aral teńizi basseınindegi ekologııalyq jáne áleýmettik-ekonomıkalyq daǵdarysty eńserý úshin jumys isteýde. Óńir elderiniń bastamasymen qurylǵan Halyqaralyq Araldy qutqarý qory jumys istep tur. Qazaqstan Aral teńizin qalpyna keltirý baǵdarlamasyn iske asyrý aıasynda sý kólemin ulǵaıtty», – dedi Máýlen Áshimbaev.

Kezdesý sońynda eki tarap Qazaqstan men EQYU arasyndaǵy yntymaqtastyqty arttyrýǵa múddeli ekenderin bildirdi.