Máýlen Áshimbaev: Qazaq pen qyrǵyzǵa ortaq tulǵalar týraly fılmder túsirgen jón
BІShKEK. QazAqparat – QR Prezıdentiniń kómekshisi Máýlen Áshimbaev qazaq pen qyrǵyzǵa ortaq tulǵalar týraly tanymdyq kitaptar shyǵaryp, fılmder túsirýge shaqyrdy, dep habarlaıdy QazAqparat tilshisi.
«Búgingi forýmda zııalylarymyzdyń ózara baılanysyn ári qaraı damytýdyń joldaryn talqylaýǵa nıettenip otyrmyz. Bul baǵytta birneshe jobany birlese júzege asyrýǵa bolar edi. Eń aldymen, ǵalymdar men mamandarǵa ortaq ǵylymı-zertteý jumystaryn júıeli júrgizý úshin múmkindikter jasaǵan durys bolar edi dep sanaımyz. Bul ǵylymı áleýetimizdi arttyrýǵa septigin tıgizedi.
Mádenı muramyzdy, tereń tarıhymyzdy dáripteıtin de birlesken jobalar qajet. Mysaly, qazaq pen qyrǵyzǵa ortaq tulǵalar týraly tanymdyq kitaptar shyǵaryp, fılmder túsirgen jón», - dedi M. Áshimbaev Bishkekte Qazaq-qyrǵyz zııalylarynyń IV forýmynda.
Sonymen qatar QR Prezıdentiniń kómekshisi zııaly qaýym ókilderi jastarymyzdyń tyǵyz baılanysta bolýyn nasıhattaýy kerek ekenin atap ótti.
«Jastar eki eldiń yntymaqtastyǵyn jalǵastyrýy tıis. Ózara stýdent almasý tájirıbesin ári qaraı damytqan oryndy dep sanaımyz. Mundaı bastamaǵa joǵary oqý oryndary belsene atsalysqany abzal.
Ǵalymdarymyz ben oqytýshylarymyz turaqty túrde bir-birimizdiń ýnıversıtetterimizge kelip, dáris oqysa da artyq etpeıdi. Sondaı-aq, baspasózde, ǵylymı basylymdarda eki eldiń de avtorlary óz maqalalaryn jarııalap otyrǵany jón dep oılaımyz. Bul eki eldiń zııaly qaýym ókilderiniń ustanymyn tereńirek túsinýge múmkindik beretini sózsiz. Jalpy, eki halyqty ári qaraı jaqyndastyra túsetin basqa da jobalardy júzege asyrýǵa bolar edi. Osynda bas qosqan azamattar osy oılardy jalǵastyryp, forým taqyrybyna qatysty tyń pikirler aıtady dep oılaımy», - dedi Máýlen Áshimbaev.
Budan buryn habarlanǵandaı, Bishkekte «Bekem baýyrlastyq baılanystar» taqyrybynda ótken forýmda Halyqaralyq Túrki akademııasy basyp shyǵarǵan úsh jańa kitaptyń tusaýkeser rásimi ótti.
Sonymen qatar búgingi jıynda M. Áshimbaev eki el zııaly qaýym ókilderi jıi kezdesip tursa, túrli saladaǵy yntymaqtastyǵymyz arta túsetinin málim etti.
