Máýlen Áshimbaev: Qazaq-qyrǵyz qatynastarynyń jańa kezeńi ashyldy

ASTANA. QazAqparat - Qazaqstan Prezıdenti Nursultan Nazarbaev pen Qyrǵyzstannyń jańa basshysy Sooronbaı Jeenbekovtiń kezdesýi eki eldiń qarym-qatynasynda jańa kezeńdi ashyp otyr. Bul týraly Parlament Májilisi Halyqaralyq ister, qorǵanys jáne qaýipsizdik komıtetiniń tóraǵasy Máýlen Áshimbaev QazAqparat tilshisine aıtyp berdi.

«30 qarashada Mınskte Qazaqstan men Qyrǵyzstan Prezıdentteriniń kezdesýi, sonymen qatar osy kezdesýdiń qorytyndysy boıynsha eki el úkimetteri tarapynan Jol kartasyna qol qoıylýy Qazaqstan men Qyrǵyzstan baılanystarynda jańa kezeńdi ashyp otyr», - dedi Máýlen Áshimbaev agenttikke bergen suhbatynda.

Onyń paıymynsha, Belarýs astanasynda eki el memleket basshylary arasynda óte tyǵyz talqylaýlar bolyp, onyń nátıjesinde jedel túrde Jol kartasyna qol qoıyldy.

«Mınskte qol jetkizilgen ýaǵdalystyqtardy, sondaı-aq  Jol kartasynda eskerilgen basymdyqtardy júzege asyrý eki el arasyndaǵy qarym-qatynastardy nyǵaıtýǵa múmkindik beretini anyq»,- dedi depýtat.

Máýlen Áshimbaevtyń atap ótýinshe, Jol kartasynda qazirgi máselelerdi sheshýge yqpal etetin óte mańyzdy sharalar qarastyrylǵan. Olar Qyrǵyzstan tarapyna ónimniń sanıtarlyq, veterınarlyq, fıtosanıtarlyq baqylaýyn qamtamasyz etýge baılanysty bolyp otyr. Óıtkeni bul taýarlar Qazaqstan aýmaǵyna jáne ary qaraı elimiz arqyly EAEO-nyń ózge de elderine tasymaldanady.

«Mundaı baqylaýdy kúsheıtý boıynsha tıisti sharalar Jol kartasynda eskerilgen, sonymen qatar Qyrǵyzstanda kedendik ári salyqtyq ákimshilendirýdi kúsheıtý sharalary qarastyrylǵan. Bul qadamdar jáne olardy iske asyrý EAEO aıasynda Qyrǵyzstan arasynda qabyldanǵan barlyq ýaǵdalastyqtardy qamtamasyz etýge múmkindik beredi», - dedi ol.

Depýtat óz sózinde Qazaqstan men Qyrǵyzstan óte jaqyn elder ekenin, memleketterdiń kóptegen birlesken ekonomıkalyq múddeleri qalyptasqanyn, al halyqtar baýyrlas ekenin eske salyp ótti.

«Osy oraıda bizdiń qarym-qatynastardy tereńdetý, yntymaqtastyqty nyǵaıtý Qazaqstanǵa da, Qyrǵyzstanǵa da tıimdi»,- dedi M. Áshimbaev.

Esterińizge sala keteıik, jaqynda QR Premer-Mınıstriniń birinshi orynbasary Asqar Mamın men Qyrǵyzstan Premer-Mınıstriniń orynbasary Tolkýnbek Abdygýlov ekijaqty ekonomıkalyq yntymaqtastyq týraly Jol kartasyna qol qoıdy . 

 Jol kartasy shekara, kólik, fıtosanıtarııalyq jáne veterınarlyq baqylaý, kedendik jáne salyqtyq ákimshilendirý salalary boıynsha ózara qarym-qatynas, sondaı-aq ekijaqty yntymaqtastyqtyń mańyzdy máselelerin sheshýge negizdelgen 50 sharany qamtıdy. Qujatta  tez arada qolǵa alynýy tıis 16 shara, qysqa ýaqytta jasaýy tıis 5 jáne  júıeli túrde jasalatyn 29 shara eskerilgen.

Jol kartasyna qol qoıǵan soń Qazaqstan men Qyrǵyzstan EAEO syrtqy shekarasynda kedendik, salyqtyq, veterınarlyq, fıtosanıtarııalyq jáne sanıtarlyq-epıdemıologııalyq baqylaý júrgizýdi qamtamasyz etýdiń jańa tásilderine, sondaı-aq Qazaqstan-Qyrǵyz shekarasy arqyly eksporttyq-ımporttyq jáne tranzıttik taýarlardy Eýrazııayq ekonomıkalyq komıssııa ókideriniń qatysýymen ótkizýge qol jetkizedi.

Qyrǵyz tarapy joǵaryda kórsetilgen salalar boıynsha EAEO talaptaryna tolyqtaı saı keletin dárejede baqylaý jasaýdy moınyna aldy.