Máýlen Áshimbaev Italııa Parlamenti Senatynyń Tóraǵasymen kelissózder júrgizdi
Sapar aıasynda ol Italııa Parlamenti Senatynyń Tóraǵasy Marııa Elızabetta Albertı-Kazelattımen kezdesti.
Kezdesý barysynda taraptar Qazaqstan men Italııa arasyndaǵy parlamentaralyq baılanysty nyǵaıtý máselesin talqylady. Sondaı-aq eki eldiń ekonomıka, saýda, týrızm, mádenıet jáne taǵy basqa baǵyttar boıynsha yntymaqtastyǵyn arttyrýǵa yqpal etýde depýtattardyń belsendi jumysy mańyzdy ekeni sóz boldy.
Máýlen Áshimbaev senatorlardyń elimizdegi bıznes-ahýaldy jaqsartýǵa arnalǵan zańnamalyq jumysyna toqtalyp ótti. Osyǵan oraı ol óńiraralyq yntymaqtastyq arqyly eki eldiń saýda-ekonomıkalyq baılanystaryn keńeıtýdi jáne bul jumysqa senatorlardy jumyldyrýdy usyndy.
«Óńiraralyq yntymaqtastyq arqyly Qazaqstannyń saýda-ekonomıkalyq baılanystarynyń áleýetin arttyrýǵa múmkindik bar. Qazaqstan men Italııa Senattaryndaǵy depýtattyq quramnyń óńirlik ókildik sıpatyn eskere otyryp, parlamentshilerdiń bilimi men tájirıbesin eki eldiń óńirleri arasynda baılanys ornatýǵa jumyldyrýǵa bolady dep esepteımiz. Atap aıtqanda, parlamenttik delegatsııalardyń saparlary kezinde óńirlermen tanysý jáne basqa da is-sharalar qyzyǵýshylyq týdyrýy múmkin», – dedi Máýlen Áshimbaev.
Suhbat kezinde jasyl ekonomıkany damytý jáne osy baǵyttaǵy zań shyǵarý tájirıbesimen almasý máselesi de sóz boldy.
«Jasyl ekonomıkany damytý Qazaqstan úshin Memleket basshysy belgilep bergen basymdyqtardyń biri. Bul másele boıynsha da bizdiń birlesip jumys isteýimizge zor múmkindik bar. Sondyqtan energııalyq turǵydan tıimdi, tabıǵı taza tehnologııalardy engizý isinde ıtalııalyq seriktestermen yntymaqtastyq ornatamyz dep úmittenemiz. Osy oraıda qorshaǵan ortany qorǵaýǵa jáne «jasyl» tehnologııany engizýge qatysty quqyqtyq bazany jetildirý máselesinde Qazaqstan men Italııa Parlamentteri Senattarynyń tájirıbe almasýyna múmkindk mol», – dedi Máýlen Áshimbaev.
Óz kezeginde Marııa Elızabetta Albertı-Kazelattı elderimiz arasyndaǵy parlamentaralyq yntymaqtastyqtyń joǵary deńgeıi týraly aıtty. Onyń aıtýynsha, ekijaqty kún tártibindegi máselelerdi sheshý úshin parlamentshilerdi belsendi jumyldyrýdyń mańyzy zor.
Odan bólek, suhbattasýshylar Qazaqstan men Italııa Senattary arasynda turaqty dıalogty jalǵastyrý ekijaqty yntymaqtastyqty nyǵaıtýdyń mańyzdy tetigi ekenin aıtty. Sondaı-aq Máýlen Áshimbaev eki eldiń Palatalary arasynda turaqty jumys isteıtin konsýltatsııa tetigin qurý máselesin qarastyrýdy usyndy.
Sonymen qatar Qazaqstan Parlamenti Senatynyń Tóraǵasy Italııa Parlamentindegi «Qazaqstan-Italııa» parlamenttik dostyq tobynyń ókilderimen kezdesti.
