Máýlen Áshimbaev issaparmen Taldyqorǵanǵa keldi
Máýlen Saǵathanuly «Nur Otan» partııasy qolǵa alǵan jobalardyń Jetisý óńirinde júzege asyrylý barysymen tanysyp, Taldyqorǵanda ashylǵan IT-synyp jáne IT-ortalyqtarynda boldy.
Bıyl Taldyqorǵan qalasynda eki IT-ortalyq ashyldy. Olardyń biri qaladaǵy agrotehnıkalyq kolledjde ornalasqan. Qazirgi tańda bul jerde oblys aýmaǵynda ashylatyn aıtı synyptardyń bolashaq oqytýshylary daıyndalýda. Almaty oblysynyń aýdan, qalalarynan kelgen alǵashqy 25 tyńdaýshy birneshe baǵytta bilimin shyńdap, túrli baǵdarlamalardy meńgerip jatyr.
Partııa tóraǵasynyń birinshi orynbasary sondaı-aq oqýshylar saraıynda bolyp, mundaǵy robototehnıka kabıneti men ІT synyp jumysymen tanysty. Bıyl bul jerde 900-ge jýyq mektep oqýshysy STEM oqytý júıesi boıynsha zamanaýı baǵdarlamalaý tilderin úırenip, bilimin shyńdaıdy. Aldaǵy úsh jylda tek Almaty oblysynda 60-tan astam ІT synyp jáne 20-ǵa jýyq robototehnıka kabıneti ashylmaq.
Sapar barysynda Máýlen Áshimbaev óńirdiń jas kásipkerlerimen kezdesip, partııanyń kásipkerlikti qoldaý máselelerin tilge tıek etti. Al partııanyń oblystyq aktıvimen kezdesý barysynda partııalyq jobalardy júzege asyrý jáne Elbasynyń bes áleýmettik bastamasynyń júzege asyrylýyna qoǵamdyq baqylaý júrgizý qajettigin eskertti.
