Máýlen Áshimbaev «Halyqqa kómek» jobasynyń bastalǵanyn jarııalady

ASTANA. QazAqparat - Nur Otan partııasynyń biryńǵaı áleýmettik tereze júıesinde qyzmet kórsetetin «Halyqqa kómek» jobasy óz jumysyn bastady. Bul týraly OKQ-da ótken baspasóz máslıhatynda Nur Otan partııasy Tóraǵasynyń birinshi orynbasary Máýlen Áshimbaev málim etti, dep habarlaıdy QazAqparat tilshisi.

Atalmysh joba halyqtyń ózekti áleýmettik máselelerin sheshýge baǵyttalyp otyr. Aıta keterligi, Memleket basshysy Nur Otan partııasynyń kezekti XVIII sezinde halyqtyń basyndaǵy jáne qoǵamdaǵy ózekti máselelerge qatysty jedel áreket etý kerektigin aıtyp, «Halyqqa kómek» jobasyn júzege asyrýdy tapsyrǵan bolatyn. Jańa bastamany partııa memlekettik organdarmen, úkimettik emes uıymdarmen jáne bıznes qaýymdastyqpen birlesip iske asyrmaq. Joba negizinde partııanyń elimizdegi barlyq qoǵamdyq qabyldaý bólmeleriniń jumysy jańǵyryp, olar Biryńǵaı áleýmettik tereze júıesinde qyzmet kórsetetin bolady.

Máýlen Áshimbaevtyń aıtýynsha, joba aıasynda qoǵamdaǵy ózekti máselelerdi jedel ári tıimdi sheshý úshin buqaralyq aqparat quraldary men áleýmettik jelilerge jarııalanǵan jazbalarǵa taldaý jasalyp, aldyn alý monıtorıngi júrgiziledi. Sondaı-aq kómekke muqtaj azamattar úshin partııaǵa tikeleı óz ótinishterin bildirýge múmkindik bar. Sol úshin qoǵamdyq qabyldaý bólmeleri «jedel ári bir jerde» qaǵıdasy boıynsha jumys isteıdi.

«Qazirgi tańda Nur Otan partııasy halyqtyń múddesin qorǵaıtyn jáne Elbasy tapsyrmalarynyń oryndalýyna baqylaý júrgizetin basty ınstıtýt bolyp tabylady. «Halyqqa kómek» jobasyn jemisti júzege asyrý úshin tek iri qalalardaǵy ǵana emes, barlyq fılıaldarymyzdaǵy qoǵamdyq qabyldaý bólmeleriniń áleýetin tolyq paıdalanamyz. Óıtkeni bizdiń basty mindetimiz - halyqtyń máselesin tıimdi sheship berý», - dedi Máýlen Áshimbaev.

Azamattardyń ótinishterin jeke qabyldaý, saıt, elektrondy poshta, Call Center sııaqty dástúrli túrlerimen birge halyqpen baılanys áleýmettik jelilerdegi paraqshalar, WhatsApp messendjeri, tıimdi keri baılanys quraly retinde tanylyp úlgergen ákimdikterdiń tsıfrly qyzmeti (iKomek, Open Almaty jáne t.b.) jáne elektrondy Úkimet portaly arqyly da júrgiziledi. Ózekti máseleni oń sheshý úshin qoǵamdyq qabyldaý bólmeleriniń qyzmetkerlerimen birge memlekettik organ ókilderi, qajet jaǵdaıda salalyq mamandar (zańger, psıholog jáne t. b.) jumyldyrylady.

Máýlen Áshimbaevtyń aıtýynsha, qazirgi tańda partııa halyq pen bılikti baılanystyrýshy altyn kópir retinde qalyptasyp otyr. «Halyqqa kómek» jobasy arqyly qoǵamdyq qabyldaý bólmeleri Elbasynyń áleýmettik salaǵa qatysty tapsyrmalaryn oryndaý barysynda memlekettik organdardyń, úkimettik emes uıymdardyń jáne bıznes qaýymdastyqtyń qyzmetterin úılestirýshi róldi atqarady.