Máýlen Áshimbaev: Elge qyzmet etýge nıet bildirgen jastar áskerı komıssarıattarǵa kelip jatyr
«Memleket basshysynyń Jarlyǵyna sáıkes qazir elimizdiń barlyq óńirinde aýmaqtyq áskerler jasaqtalyp jatyr. Sarbazdardyń aldy mindetterine kirisip te ketti. Olar koronavırýs indetimen kúres jumystaryna jumyldyrylýda.
Osy rette qıyn-qystaý shaqta sapqa turǵandardyń basym bóligi óz erikterimen suranyp kelgen azamattar ekenin erekshe atap ótkim keledi. Tipti keıbir óńirlerde shaqyrylǵandardyń sany boljanǵan shekten asyp ketken. Elge qyzmet etýge nıet bildirgen jastar jergilikti jerlerdegi áskerı komıssarıattarǵa áli de kelip jatyr. Kúrdeli kezeńde kópke úlgi kórsetken erikti sarbazdardyń ishinde belgili sportshylar men óner juldyzdary da az emes. Solardyń qatarynda kók týymyzdy rıng pen sahnada birdeı jelbiretip júrgen Ibragım Eskendir baýyrymyz bar. Qol kúresinen halyqaralyq saıystarda el namysyn abyroımen qorǵaı bilgen Tımýr Sypataev ta el úshin eńbek etýge daıar ekenin bildirdi», - deıdi Máýlen Áshimbaev.
Sondaı-aq, ol zapastaǵy ofıtserler de qandaı jumys bolsa da daıyn ekenin aıtyp, qatarǵa qosylyp jatqanyn aıtty.
«Elordada aǵaıyndy tórt birdeı jigittiń óz erikterimen arnaýly jıynǵa kelip, áskerge alynǵanyn osy áleýmettik jeli arqyly bilip jatyrmyz. Munyń bári naǵyz eldik pen birliktiń jarqyn kórinisi ekeni sózsiz.
Shyn máninde, biz el basyna kún týǵanda atqa qonǵan qaısar halyqtyń urpaǵymyz. Jastarymyz qazirgideı syn saǵatta judyryqtaı jumylý arqyly sony aıqyn dáleldep berdi. Ár azamatymyz osylaı jaýapkershilikti sezinip, Otan úshin uıysa bilse kez kelgen synaqtan súrinbeı ótemiz.
Yrys-yntymaqtyń arqasynda buǵan deıin de talaı dúrbeleńnen aman qaldyq. Oǵan tarıh kýá. Bul joly da dál solaı bereke-birlik tanytyp, indetti birge eńseretinimizge senemiz», - dep tolyqtyrdy QR Prezıdenti Ákimshiligi Basshysynyń birinshi orynbasary.
