Máýlen Áshimbaev EQYU ókilderimen kezdesti
Partııa baspasóz qyzmetiniń málimetinshe, kezdesýde taraptar aldaǵy Qazaqstan Respýblıkasy Prezıdentiniń kezekten tys saılaýyna qatysty máselelerdi talqylady.
«Nur Otan» partııasy Tóraǵasynyń birinshi orynbasary Qazaqstannyń táýelsizdiktiń alǵashqy jyldarynan bastap EQYU-nyń halyqaralyq qaýipsizdikti saqtaý, beıbitshilikti qamtamasyz etý, adam quqyqtaryn qorǵaý jáne demokratııalyq tetikterdi ilgeriletýge baǵyttalǵan saıasatyn qoldap kele jatqanyn aıtty. Sondaı-aq ol qazirgi tańda Qazaqstan men EQYU arasyndaǵy qarym-qatynastyń kúsheıe túskenine nazar aýdardy.
«Qazaqstannyń EQYU-men yntymaqtastyǵy elimizdiń osy uıymǵa tóraǵalyq etken kezeńinde burynǵydan da nyǵaıa tústi. Sol kezde qabyldanǵan Astana deklaratsııasy uıymnyń damýyna tyń serpin bergen mańyzdy qujat boldy», - dedi Máýlen Áshimbaev.
Sonymen qatar ol EQYU-nyń barlyq standarttary Qazaqstannyń memlekettik baǵdarlamalary úshin negizgi baǵdar bolyp sanalatynyn tilge tıek etti.
Onyń aıtýynsha, Qazaqstan úshin EQYU-men, uıymnyń Demokratııalyq ınstıtýttar jáne adam quqyqtary jónindegi bıýrosymen jáne basqa da qurylymdarymen yntymaqtastyqty odan ári nyǵaıtý asa mańyzdy. Sondyqtan ol aldaǵy ýaqytta ekijaqty qarym-qatynastyń damı túsetinine senim bildirdi. Munan bólek, M.Áshimbaev dál qazir qazaqstandyqtardyń tarıhı kezeńdi bastan ótkerip jatqanyna nazar aýdaryp, Nursultan Ábishuly Nazarbaev Qazaqstan Prezıdenti retindegi ókilettigin toqtatqanymen, «Nur Otan» partııasynyń Tóraǵasy bolyp qala beretinin jetkizdi.
«Bizdiń partııa Elbasymyz aıqyndap bergen elimizdiń barlyq strategııalyq maqsattaryna qol jetkizý jolyndaǵy jumystaryn jalǵastyra beredi. Sondyqtan aldaǵy prezıdent saılaýyna belsendi túrde qatysamyz. Kelesi aptada ótetin partııanyń kezekten tys XIX sezinde saılaýǵa qatysatyn kandıdatymyzdy usynamyz. «Nur Otan» saılaýdyń ashyq ári ádil ótýine jáne barlyq demokratııalyq normalardyń saqtalýyna múddeli. Óıtkeni bul bılik sabaqtastyǵyn qamtamasyz etetin tetikterdiń biri bolyp sanalady», - dedi Máýlen Áshimbaev.
Óz kezeginde EQYU Demokratııalyq ınstıtýttar jáne adam quqyqtary jónindegi bıýrosynyń saılaý jónindegi keńesshisi Radıvoıa Grýıch elimizge Qazaqstannyń Syrtqy ister mınıstrliginiń usynysy boıynsha kelgenderin aıtty.
«Biz munda saılaýǵa qatysty keıbir talaptarǵa baǵalaý jumystaryn júrgizip, aldaǵy saıası naýqanǵa daıyndyqtyń qazirgi deńgeıin baǵamdaımyz. Sondaı-aq Uıymnyń atynan saılaýǵa baıqaýshylar jiberý isin pysyqtap, Qazaqstannyń birqatar memlekettik organdarymen, buqaralyq aqparat quraldarymen jáne saıası partııa ókilderimen kezdesýler ótkizemiz», - dedi Radıvoıa Grýıch.
