Máýlen Áshimbaev Ekibastuz — Aǵadyr jelisindegi apat týraly: Bul apattar kezdeısoq bolǵan joq
ASTANA. QazAqparat – QR Parlamenti Senatynyń tóraǵasy Máýlen Áshimbaev «Tıimdi óńirlik saıasat – elimizdiń ornyqty áleýmettik-ekonomıkalyq damýynyń negizi» taqyrybyndaǵy Parlamenttik tyńdaýda eldegi jylý-elektr júıesiniń tozýyna alańdaýshylyq bildirdi, dep habarlaıdy QazAqparat tilshisi.
«Qabyldanyp jatqan sharalarǵa qaramastan, óńirlerde ınfraqurylym máseleleri ózekti bolyp tur. Birinshi kezekte, áńgime jylý jáne elektrmen jabdyqtaý máselesi týraly bolyp otyr. Ózderińiz biletindeı, bıyl qysta Ekibastuzda apat boldy. Qala turǵyndary qystyń aıazdy kúnderinde jylýsyz qaldy. Rýdnyı jáne Rıdder qalalarynda da apat boldy. Jýyqta ǵana Ekibastuz — Aǵadyr jelisindegi apattyń saldarynan birden 6 oblysta elektr qýatyn berý kólemi shekteldi. Ókinishke qaraı, bul apattar kezdeısoq bolǵan joq. Bul osy saladaǵy qordalanǵan júıeli problemalardyń kórinisi. Jalpy elektr stansalarynyń negizgi qondyrǵylarynyń tozýy 57 paıyzǵa jetip otyr. Al jekelegen óńirlerde bul kórsetkish 88 paıyzǵa deıin barady», - dedi Senat spıkeri.
Onyń sózine qaraǵanda, jyl saıyn jylý-elektr ortalyqtarynyń tozý deńgeıi artyp keledi.
«Qazir onyń tozý kórsetkishi 66 paıyzǵa jetken. Jylý-elektr ortalyqtarynyń tozýy jekelegen óńirlerde 90 paıyzdan asady. Memleket basshysynyń generatsııalaýshy qýattardyń tozýyn «Investıtsııalardyń ornyna tarıf» baǵdarlamasynyń esebinen tómendetý týraly tapsyrmasy bar. Tıisti memlekettik organdar tarapynan bul baǵytta naqty qadamdar qajet», - dedi Máýlen Áshimbaev.
