Máýlen Áshimbaev: Dál qazir bizge ózara senim men dıalog kerek
«Memleket basshysy Qasym-Jomart Kemeluly Toqaev elimizdegi áleýmettik-ekonomıkalyq jaǵdaıǵa qatysty keńes ótkizdi. Keńes barysynda qazirgi ahýaldy turaqtandyrý úshin munaı ónimderiniń baǵasyna 180 kúnge memlekettik retteýdi engizý jóninde naqty tapsyrma berdi. Sondaı-aq áleýmettik mańyzy bar azyq-túlik taýarlarynyń baǵasy boıynsha memlekettik retteýdi engizý, kommýnaldyq tarıfterdi kóterýge 180 kúnge moratorıı engizý qajettigin qarastyrý, halyqtyń áleýmettik jaǵdaıy nashar toptary úshin naryqtaǵy baspanany jalǵa alý qunyn sýbsıdııalaý máselesin qarastyrý, densaýlyq saqtaý jáne balalar máselelerin sheshý úshin «Qazaqstan halqyna» dep atalatyn qoǵamdyq qor qurý, ony memlekettik jáne jeke kózder arqyly qarjylandyrý jóninde qosymsha tapsyrmalar berdi.
Prezıdentimiz «Jeke tulǵalardyń bankrottyǵy týraly» zań ázirleýdi jáne Bas prokýratýraǵa Básekelestikti qorǵaý agenttigimen birlesip, baǵalyq sóz baılasý men básekelestikke qarsy basqa da is-áreketterge qatysty tergeý júrgizýdi de tapsyrdy»,- dep jazdy M.Áshimbaev jelidegi paraqshasynda.
Sonymen qatar ol Memleket basshysy búgin túnde Qazaqstan halqyna beıneúndeý jarııalap, eldi ishten jáne syrttan bolǵan san túrli jalǵan aqparattarǵa senip, ereýilge salynǵan toptyń qıturqy áreketteri men tártipsizdikke ermeı, parasatpen jáne aqylmen ǵana sheshim qabyldaýǵa shaqyrǵanyn jáne Prezıdentimiz aıtqandaı, dál qazir bizge ózara senim men dıalog kerek ekenin jetkizdi.
«Azamattardyń qaýipsizdigin jáne qoǵamdyq qaýipsizdikti qamtamasyz etý úshin Memleket basshysynyń Jarlyǵymen Almaty qalasy men Mańǵystaý jáne Almaty oblystarynda tótenshe jaǵdaı engizilgeni belgili. Prezıdentimiz qabyldaǵan bul shuǵyl sharalar elimizdiń turaqtylyǵyn nyǵaıtýdy kózdeıdi. Sondyqtan dál qazir bizder úshin Memleket basshysynyń sheshimderine qoldaý bildirip, eldiń bereke-birligin bekemdeı túsý asa mańyzdy», - dep tolyqtyrdyrdy ol.
Eske salsaq, QR Prezıdenti Qasym-Jomart Toqaev Almaty oblysynda tótenshe jaǵdaıdy engizý týraly Jarlyqqa qol qoıdy. Buǵan deıin Almaty qalasy men Mańǵystaý oblysynda tótenshe jaǵdaı engizildi.
