Máýlen Áshimbaev: Bıylǵy sezd álem úshin tarıhı jáne biregeı oqıǵaǵa aınalady

NUR-SULTAN. QazAqparat - Bıylǵy Álemdik jáne dástúrli dinder kóshbasshylary sezi álem úshin tarıhı jáne biregeı oqıǵaǵa aınalady. Bul týraly Senat tóraǵasy – Álemdik jáne dástúrli dinder kóshbasshylary sezi hatshylyǵynyń basshysy Máýlen Áshimbaev aıtty, dep habarlaıdy QazAqparat tilshisi.

«Biz búgin aldaǵy forýmǵa qatysty birqatar uıymdastyrý máselelerin talqylap, taǵy bir pysyqtap alý úshin jınalyp otyrmyz. Aldymen, VII sezdi uıymdastyrý jolynda birlesip atqarǵan aýqymdy jumystaryńyz úshin barshańyzǵa shyn kóńilden alǵys bildiremiz. Bıylǵy sezd álem úshin tarıhı jáne biregeı oqıǵaǵa aınalady desek, artyq bola qoımas. Eń aldymen, bul - koronavırýs pandemııasy bastalǵaly beri alǵash ret ótkizilip otyrǵan Álemdik jáne dástúrli dinder lıderleriniń sezi», - dedi ol sezd hatshylyǵynyń HH otyrysynda.

Senat tóraǵasy indet kezinde dıalog pen tikeleı qarym-qatynas jetispegenin basa aıtty.

«Sezd rýhanı kóshbasshylarǵa tikeleı suhbat qurýǵa, dinaralyq jáne órkenıetaralyq dıalogty nyǵaıtýdyń mańyzdy máselelerin birlesip qaraýǵa, sondaı-aq álemdi alańdatqan ózekti problemalardy sheshý joldaryn talqylaýǵa úlken múmkindik beredi. Sondyqtan aldaǵy sezd mazmundy ári tabysty bolady dep senemiz», - dedi Máýlen Áshimbaev.