Máýlen Áshimbaev: Bilim berý júıesi álemdik trendterge sáıkes qaıta qurylýy tıis
NUR-SULTAN. QazAqparat - QR Parlamenti Senatynyń tóraǵasy Máýlen Áshimbaev Senat janyndaǵy Jas sarapshylar klýbynyń kezekti otyrysyn ótkizdi. Onda qazaqstandyq bilim jáne ǵylym máseleleri talqylandy, dep habarlaıdy QazAqparat.
Senat tóraǵasy kezdesýdi asha kelip, atalǵan taqyryptyń mańyzdylyǵyn atap ótti jáne osy salany damytýdaǵy keıbir trendterge toqtaldy.
«Qazaqstannyń bilim jáne ǵylym júıesiniń qalyptasýy men damýy bizdiń memleketimizde árqashan basymdyqtardyń biri bolyp keledi. Elimiz Prezıdentiniń qyrkúıek aıyndaǵy Joldaýynda birqatar mańyzdy tapsyrma alǵa qoıyldy. Jalpy alǵanda, elimizdi jańǵyrtý baǵdarlamalary aıasynda osy salaǵa basa nazar aýdarylyp otyr», - dedi Máýlen Áshimbaev.
Senat tóraǵasy COVID-19 bilim berý júıesiniń jumysynyń qyzmetine eleýli problemalar týyndatqanyn atap ótti. Sonymen birge, pandemııa oqytýda jańa ádisterdi engizý múmkindigi men engizý kerektigin, al qashyqtan bilim berý áleýetin keńinen qoldaný kerek ekenin kórsetip otyr.
M. Áshimbaev sondaı-aq bilim berý salasyndaǵy álemniń barlyq elderine tán mazmundy ózgeristerge toqtaldy.
Іs-sharaǵa QR Bilim jáne ǵylym mınıstri Ashat Aımaǵambetov qatysty. Ol salalyq mekemede atqarylyp jatqan jumystar men Memleket basshysynyń bilim berý júıesin reformalaý jónindegi tapsyrmalarynyń oryndalýy týraly aıtyp berdi.
«Biz jańa álemde, jańa jaǵdaıda ómir súrip jatyrmyz. Bilim berý júıesi de oǵan beıimdelýi kerek. Másele jańa reformalar júrgizý emes. Bizge barlyq ózgeristerdiń tıimdi bolǵany, qazaqstandyqtardyń bilim deńgeıi arta túskeni, ýaqyt talabyna sáıkes keletin quzyretterdi qalyptastyrýǵa jaǵdaı jasalǵany mańyzdy», - dep atap ótti mınıstr.
Senat baspasóz qyzmetiniń málimetinshe, jas sarapshylar klýbynyń otyrysy barysynda pikirtalasqa qatysýshylar qazaqstandyq bilim men ǵylymnyń ózekti máseleleri boıynsha óz pikirlerin ortaǵa saldy.
Youth Corps Projecttegi monıtorıng jáne baǵalaý jónindegi sarapshy, áleýmettanýshy Kamıla Kovıazına orta bilim berýdiń jańartylǵan mazmunyna kóshý aıasynda muǵalimderdiń biliktiligin arttyrý máseleleri týraly aıtyp berdi.
Prezıdenttik jastar kadrlyq rezerviniń múshesi, saıasattanýshy Indıra Rystına joǵary jáne joǵary oqý ornynan keıingi bilim berý máselelerine toqtaldy.
Kzhol qaıyrymdylyq qorynyń qamqorshylyq keńesiniń múshesi Dıana Erlan erekshe qajettiligi bar balalarǵa arnalǵan bilim berý salasyn damytý jónindegi óz usynystaryn ortaǵa saldy. Al Ulttyq bıotehnologııa ortalyǵynyń adam genetıkasy zerthanasynyń meńgerýshisi Maqsat Jabaǵın Qazaqstanda ǵylymı kadrlar daıarlaýdaǵy ózekti máselelerdi atap ótti.
