Máýlen Áshimbaev Ázerbaıjan Mıllı Medjlısiniń Spıkeri Sahıba Gafarovamen kezdesti
Kezdesý barysynda parlamentaralyq yntymaqtastyqty damytýdyń keleshegi, naqty aıtqanda, eki elde júrgizilip jatqan reformalardy quqyqtyq qamtamasyz etýdegi zań shyǵarý jumystary boıynsha tájirıbe almasý máseleleri sóz boldy.
«Ázerbaıjan – Qazaqstannyń strategııalyq seriktesi. Bizdiń tarıhymyz ortaq, tamyrymyz bir. Elimiz ben halqymyzdy ǵasyrlarǵa jalǵasqan berik dostyq jáne ortaq mádenıet pen dástúr baılanystyrady. Eki eldiń Parlamentterinde Yntymaqtastyq toptary quryldy. Zań shyǵarý jumysynda elderimizde júrgizilip jatqan reformalardy quqyqtyq qamtamasyz etý baǵyty boıynsha tájirıbe almasýdyń mańyzy zor. Pandemııaǵa baılanysty jaǵdaıdyń turaqtalýyna qaraı salalyq komıtetterdiń konsýltatsııalaryn jáne ózekti máseleler boıynsha birlesken «dóńgelek ústelderdi» jıirek uıymdastyrýǵa bolady», – dedi Máýlen Áshimbaev.
Sondaı-aq Senat Spıkeri Qazaqstan Parlamentiniń depýtattary ázerbaıjandyq áriptesterimen TMD PAA, EQYU PA jáne Parlamentaralyq odaq sııaqty halyqaralyq parlamenttik alańdarda ózara tıimdi yntymaqtastyqty nyǵaıtýǵa basa mán beretinin atap ótti. Suhbat barysynda Máýlen Áshimbaev áriptesin kelesi jyly Almatyda ótetin TMD PAA Keńesiniń mereıtoılyq sessııasyna qatysýǵa shaqyrdy.
Sonymen qatar kezdesýde ekonomıka, saýda, kólik, energetıka, ónerkásip, aýylsharýashylyǵy jáne mádenı-gýmanıtarlyq baǵyttar boıynsha ekijaqty ózara is-qımyldy keńeıtý máseleleri talqylandy.
Іs-shara sońynda Senat Tóraǵasy Qazaqstan men Ázerbaıjan Parlamentteri arasyndaǵy ózara baılanys eki memlekettiń yntymaqtastyǵyn nyǵaıtý aıasynda keńeıe túsetinine senim bildirdi.
