Máýlen Áshimbaev: Arandatýǵa erý esh jaqsylyq ákelmeıdi
NUR-SULTAN. QazAqparat - «Arandatýǵa erý eshqandaı jaqsylyqqa ákelmeıdi. Oǵan alystan mysal izdeýdiń qajeti joq. Keıbir kórshi memleketterde bolǵan jaǵdaıdan, olardyń tutastyǵyna kelgen nuqsan men ekonomıkalyq zardabynan sabaq alǵanymyz jón». QR Parlamenti Senatynyń Tóraǵasy Máýlen Áshimbaev osyndaı pikir bildirdi.
«Eldegi ahýal bárimizdi alańdatyp otyr. Jaǵdaıdy turaqtandyrý úshin memleket tarapynan jedel sharalar qabyldanýda. Prezıdentimiz Qasym-Jomart Kemeluly Toqaev tıisti memlekettik organdarǵa birqatar shuǵyl tapsyrma berdi. Keshe keshkisin Memleket basshysy Qaýipsizdik Keńesiniń Tóraǵasy retinde Keńestiń otyrysyn ótkizdi. Jıynda elimizdiń turaqtylyǵyna qaýip tóndirgen terrorıstik jáne qylmystyq árekettermen kúres máseleleri talqylandy.
Ókinishke qaraı, elimizdiń birqatar óńirinde, ásirese, Almaty qalasynda ózderin ereýilshiler dep ataıtyn arandatýshylar toby qasaqana áreketterge barýda. Olardyń ákimdikterge, áleýmettik jáne ınfraqurylymdyq nysandarǵa shabýyl uıymdastyrǵany belgili. Jedel járdem kóliginiń jolyn bógegen jáne tártip saqshylaryna kúsh qoldanǵan jaǵdaılar da tirkeldi. Dúkenderdi qıratý, tonaý, maroderlikke barý oqıǵalary beleń aldy. Mundaı áreketter ishki jaǵdaıdy odan ári ýshyqtyrýdy kózdeıtini túsinikti. Bul – Prezıdentimiz aıtqandaı, qaskóılerdiń jan-jaqty oılastyrylǵan terrorıstik is-áreketi», - deıdi joǵary palatanyń tóraǵasy.
Sondaı-aq, Máýlen Áshimbaev osyndaı syn saǵatta bizdiń basty mindetimiz Táýelsizdikti jáne memlekettilikti saqtaý ekenin, barsha qazaqstandyq osy jolda judyryqtaı jumylýǵa tıistigin, eń bastysy, arandatýshylardyń aıtaǵyna ermeý kerektigin atap ótti.
«Arandatýǵa erý eshqandaı jaqsylyqqa ákelmeıdi. Oǵan alystan mysal izdeýdiń qajeti joq. Keıbir kórshi memleketterde bolǵan jaǵdaıdan, olardyń tutastyǵyna kelgen nuqsan men ekonomıkalyq zardabynan sabaq alǵanymyz jón. Sondyqtan el ishine iritki salýshylardyń sózine erip, eldigimizge syzat túsirmeıik. Óz bolashaǵymyzǵa balta shappaıyq.
El de, jer de ózimizdiki. Bul – bizge babadan qalǵan amanat. Endi sony saqtap, keler býynǵa jetkizýimiz qajet. Ol úshin memlekettilikti bárinen bıik qoıýymyz kerek. Sondyqtan birligimizdi bekemdeı túseıik, berekemizdi qashyrmaıyq. Osyndaı kúrdeli kezeńde eldiń turaqtylyǵy men tutastyǵyn saqtaý úshin Prezıdentimizge qoldaý bildirip, eldigimiz ben birligimizdi kórseteıik», - dep túıdi sózin ol.
