Máýlen Áshimbaev Almaty oblysynyń máslıhat depýtattarymen kezdesti
Óz sózinde palata spıkeri Qazaqstannyń áleýmettik-ekonomıkalyq damý máseleleri jónindegi keńeste el Prezıdenti júktegen mindetterdi sapaly ári jedel iske asyrý qajet ekenin aıtty.
Sondaı-aq Máýlen Áshimbaev Senat óńirlerdiń múddesin qorǵaıtyn palata ekenin tilge tıek etip, aldaǵy ýaqytta da máslıhattarmen baılanys kúsheıe túsetinin jetkizdi.
Osyǵan oraı Senat tóraǵasy aldaǵy birlesken jumystyń basym baǵyttaryn aıqyndap berdi. Máýlen Áshimbaevtyń aıtýynsha, qazirgi tańda jańa formatsııadaǵy zańdardy ázirlep, qabyldaý jumysyna máslıhat depýtattaryn belsendi jumyldyrǵan jón.
Al, senatorlar óńirlerdiń damý máselelerine basa mán berýge jáne júıeli problemalardy sheshýge zańnamalyq turǵydan yqpal etýge tıis.
«Ár óńirde ózine tán ózekti máseleler bar. Olardyń basym kópshiligi, Prezıdentimiz atap kórsetkendeı, ınfraqurylymǵa, áleýmettik nysandarǵa, memlekettik baǵdarlamalardyń iske asyrylýyna qatysty. Senat depýtattary osy máselelerdi ortalyq deńgeıde júıeli túrde kóterip, olardyń oń sheshilýine yqpal etedi. Byltyr Parlament 86 zań qabyldady. Olardyń 13-ine depýtattardyń ózderi bastamashy boldy. Qabyldanǵan zańdardyń bári eldiń damýyna jáne halyqtyń ómir súrý sapasyn arttyrýǵa baǵyttalǵan. Búginde Prezıdentimiz bekitken on ulttyq joba iske asyp jatyr. Onyń bári – óńirlerge tikeleı qatysy bar qujattar. Bárimiz birge olardyń sapaly jáne jedel iske asyrylýyn qamtamasyz etýimiz kerek», – degen Máýlen Áshimbaev áriptesterin Memleket basshysy júktegen mindetterdi iske asyrý jolynda judyryqtaı jumylýǵa shaqyrdy.
Senat spıkeri búginde elimizde jergilikti memlekettik basqarý jáne ózin-ózi basqarý júıesin damytý baǵytynda aýqymdy jumys atqarylyp jatqanyn, sonyń barysynda máslıhattardyń rólin arttyrý da mańyzdy qadam ekenin aıtty.
Máýlen Áshimbaev qazirdiń ózinde qoldanystaǵy zańnamalarǵa birqatar memlekettik fýnktsııany ortalyqtan óńirlerge beretin tıisti túzetý engizilgenine nazar aýdardy.
Aldaǵy aılarda osy baǵytta taǵy biraz jańa normalar qabyldanady.
«Búginde Prezıdentimiz basqarý júıesin ortalyqsyzdandyrý máselesine úlken mán berip otyr. Osy maqsatty júzege asyrý úshin jýyrda ákimshilik reformalar boıynsha birqatar zańǵa ózgerister men tolyqtyrýlar engizildi. Nátıjesinde, Úkimettiń biraz fýnktsııasy ortalyq memlekettik organdarǵa berildi. Ákimshilik reformanyń kelesi kezeńinde biqatar quzyret jergilikti bılik organdaryna berilýge tıis. Osyǵan qatysty tıisti zańdardy aldaǵy aılarda qabyldaýdy josparlap otyrmyz. Jalpy, ákimshilik ózgeristerdiń jańa kezeńi jergilikti ókildi organdardyń quzyretin keńeıtýge jol ashady dep senemiz», – dedi Máýlen Áshimbaev.
Palata tóraǵasy máslıhattarǵa materıaldyq-tehnıkalyq jáne ádistemelik kómek kórsetý máselesine de toqtalyp ótti.
Osyǵan oraı Máýlen Áshimbaev máslıhat depýtattaryna arnalǵan turaqty semınarlar, trenıngter jáne tájirıbe almasý jumystaryn uıymdastyrýdy usyndy.
Mundaı bastamalar jergilikti ókildi organ depýtattarynyń biliktiligin arttyrýǵa múmkindik beretini anyq.
Sonymen qatar sapar barysynda Senat tóraǵasy Almaty oblysynyń belsendi jastarymen kezdesti.
Ol jas saıasatkerlerdiń jańa býyny Prezıdentimiz belgilep bergen Ádiletti Qazaqstan qurý baǵdaryn ári qaraı jalǵastyratynyna senim bildirdi.
«Ózderińizge belgili, 2019 jáne 2020 jyldary Jastar jáne Volonterler jyly bolyp jarııalandy. Bilikti jastardy eldik isterge tartý úshin Prezıdenttik jastar kadrlyq rezervi quryldy. Memleket qashanda sizderdiń oı-pikirlerińiz ben usynystaryńyzdy tyńdaýǵa daıyn. Senat janyndaǵy Jas sarapshylar klýby men Taldaý mektebiniń de negizgi maqsattarynyń biri osy. Sizderdi atalǵan jobalarǵa belsendi qatysýǵa shaqyramyz. Elimizdiń bolashaǵy jastarǵa tikeleı baılanysty. Osy jaýapkershilikti sezinip, árqaısyńyz óz salańyzda elimizdiń damýyna zor úles qosasyzdar dep senemiz», – degen palata spıkeri ár adam óz boıynda durys qundylyqtardy qalyptastyrý úshin tereń bilim men kásibı qabilet qajet ekenin aıtty.
Budan basqa, Senat tóraǵasy óńirge sapary kezinde «Sharapat» arnaýly áleýmettik qyzmetter kórsetý ortalyǵynyń ujymymen kezdesti.
