Máýlen Áshimbaev aldaǵy ýaqytta senatorlar atqaratyn mańyzdy jumystar jaıynda aıtty
NUR-SULTAN. QazAqparat – Senat tóraǵasy Máýlen Áshimbaev 2021 jyly atqaralatyn mańyzdy jumystar jaıynda aıtty, dep habarlaıdy QazAqparat tilshisi.
«Aldymyzda áli talaı mańyzdy mindetter tur. Elimizde Prezıdent bastamasymen qolǵa alynǵan saıası jáne áleýmettik-ekonomıkalyq reformalar jalǵasa beretini sózsiz. Osyndaı keshendi is-sharalardy zańnamalyq jaǵynan sapaly qamtamasyz etý – bizdiń basty mindetimiz. Ózderińiz bilesizder, Memleket basshysy Qasym-Jomart Kemeluly Toqaev áleýmettik salaǵa basymdyq berip otyr. Soǵan baılanysty qazirgi tańda jańa «Áleýmettik kodeks» ázirlenip jatyr. Bul baǵytta bir top Senat depýtatynyń bastamasymen áleýmettik kásipkerlikke qatysty zań jobasy da daıyndalýda», - dedi M. Áshimbaev Senattyń jalpy otyrysynda.
Sonymen qatar ol pandemııamen kúres, ekonomıkalyq ósýdi qamtamasyz etý máseleleri de kún tártibinen túspeıtinin jetkizdi.
«Sondyqtan kelesi jyly da elimizdiń aldynda turǵan maqsattardy júzege aıasynda birlesip, nátıjeli jumys isteıik. Qańtar aıynyń basynda sizder óńirlerde jurtshylyqpen kezdesesizder.
Sol kezde máslıhattarmen tyǵyz baılanysta bolyp, halyqtyń pikiri men usynystaryna qulaq asady dep senemin. Jańa 2021 jyl – Qazaqstannyń qoǵamdyq-saıası jáne rýhanı ómiri úshin asa jaýapty jáne erekshe jyl. 10 qańtarda Parlament Májilisi men máslıhattar depýttarynyń saılaýy ótedi. Halqymyz el jylnamasyndaǵy mejeli kezeń – Táýelsizdigimizdiń 30 jyldyǵyn atap ótedi. Sondaı-aq, kelesi jyldyń qańtar aıynda qos palataly kásibı Parlamenttiń birinshi sessııasynyń ashylǵanyna 25 jyl tolady. Sondyqtan aldymyzda biraz jumystar bar. Solardy júzege asyrýda barshańyzǵa sáttilik pen tabys tileımin», - dedi Senat tóraǵasy.
Budan buryn habarlanǵandaı, bıyl Parlament 110 zań qabyldady. Onyń 30-ǵa jýyǵyna Parlament depýtattary bastamashy boldy.
