Máýlen Áshimbaev Aqmola oblysynda aýyl sharýashylyǵy kásiporynynyń jumysymen tanysty
Jalpy aýyl sharýashylyǵynyń elimizdiń ekonomıkasynda alar orny erekshe. Sol sebepti de Elbasy bul salany udaıy basty nazarda ustap, onyń jan-jaqty damýyna barlyq jaǵdaıdy jasap keledi. «Qazaqstandyqtardyń ál-aýqatynyń ósýi: tabys pen turmys sapasyn» arttyrý atty Joldaýynda da Memleket basshysy agroónerkásip kesheniniń áleýetin tolyq iske asyrýdy aldymyzǵa mindet etip qoıdy. Sonyń ishinde eńbek ónimdiligin jáne qaıta óndelgen aýyl sharýashylyǵy óniminiń eksportyn 2022 jylǵa qaraı 2,5 ese kóbeıtýdi jáne aldaǵy úsh jyl ishinde atalǵan salany damytýǵa jyl saıyn qosymsha keminde 100 mıllıard teńge qarastyrýdy tapsyrdy. Osy maqsattardyń nátıjeli júzege asyrylýyna «Nur Otan» partııasy da tikeleı múddeli.
Aqmol aýylyna arnaıy kelgen Máýlen Áshimbaev «Shańyraq» basqarýshy kompanııasyna qarasty jumyrtqa qorabyn daıyndaıtyn tsehtyń, qus etin óndiretin zaýyttyń jáne shujyq shyǵaratyn kásiporynnyń jumysymen tanysty. Bul óndiris oshaqtarynyń barlyǵy da zaman talaptaryna saı jańa, tsıfrly tehnologııalarmen jabdyqtalyp, tabıǵı taza, sapaly ónim shyǵaryp otyr. Kásiporynnyń ónimderi Astana qalasy jáne Aqmola oblysymen birge Aqtóbe, Qostanaı, Qaraǵandy, Batys Qazaqstan, Soltústik Qazaqstan oblystary men Almaty, Shymkent qalalaryna jetkiziledi. Tipti alys-jaqyn shetelderge de eksportalatynyn atap ótken jón.
«Nur Otan» partııasy Tóraǵasynyń birinshi orynbasary kásiporyn qyzmetkerlerimen kezdesip, olardy aýyl sharýashylyǵy qyzmetkerleri kúnimen quttyqtady. Sondaı-aq ol Joldaýda aıtylǵan aýyl sharýashylyǵyn damytýǵa qatysty basymdyqtardyń mańyzyna toqtalyp ótti.
«Búginde Elbasynyń bastamasymen aýyl sharýashylyǵyna erekshe kóńil bólinip, aýqymdy jumystar atqarylýda. Memleket basshysy jańa Joldaýynda da osy salaǵa tsıfrly tehnologııalardy engizip, bilikti mamandar tartýdy jáne qomaqty qarjy bólýdi tapsyrdy. Bul bastamalar aýyl sharýashylyǵyn jańa deńgeıge kóterip, ekonomıkamyzdyń damýyndaǵy negizgi sala retinde qalyptasýyna mol múmkindik beredi. Osylaısha Memleket basshysy Qazaqstannyń álemge tek shıkizattar men mıneraldy resýrstar eksporttaıtyn el retinde ǵana emes, sondaı-aq sapaly, tabıǵı taza, daıyn aýyl sharýashylyǵy ónimderin de shyǵaratyn memleket retinde de tanylýyn qamtamasyz etýdi aldymyzǵa maqsat etip qoıdy. Bul - bizdi básekege qabiletti, damyǵan 30 eldiń qataryna bastaıtyn mańyzdy qadam», - dedi Máýlen Áshimbaev.
Sonymen qatar partııa Tóraǵasynyń birinshi orynbasary osyndaı ıgi isterdi júzege asyrýda partııa fılıaldary men bastaýysh uıymdary belsendi jumys isteıtinin jetkizdi.
«Elbasynyń senimdi tiregi jáne elimizdiń jetekshi saıası kúshi retinde «Nur Otan» partııasy aýyl sharýashylyǵyn qoldaýǵa baǵyttalǵan barlyq bastamany júzege asyrýǵa atsalysyp, osy saladaǵy jumystardy qoǵamdyq baqylaýǵa alady. Osylaısha nurotandyqtar Prezıdentimizdiń barlyq strategııalyq baǵdarlamasyn oryndaýǵa óz úlesterin qosady», - dedi Máýlen Áshimbaev.
«Shańyraq» seriktestigi taýyq eti, shujyq jáne jumyrtqa óndirisi boıynsha elimizdegi aldyńǵy qatarly óndiris oshaqtarynyń biri. Kásiporyn basshysy Denıs Plýjnıktiń aıtýynsha, mekeme Astana qalasyn qus eti ónimderimen qamtýda mańyzdy ról atqaryp otyr. Tipti elordamyzdaǵy qus etinen taǵam daıyndaıtyn álemge áıgili ashananyń ózi osy «Shańyraqtyń» ónimderin tutynady eken. Sondaı-aq kásiporyn basshysy mekemeniń «Nur Otan» partııasymen tyǵyz baılanys ornatqanyn da atap ótti.
«Kompanııada bastaýysh partııa uıymy jumys isteıdi. Barlyq partııalyq is-sharalarǵa belsene qatysyp turamyz. Bıyl partııa qyzmetin jańǵyrtý aıasynda qolǵa alynǵan jańa jobalardy júzege asyrýǵa da óz úlesimizdi qostyq. Sonyń nátıjesinde aýylymyzda ІT-synyp ashylyp, jergilikti balalardyń zamanaýı mamandyqtardy ıgerýine múmkindik týdy», - deıdi Denıs Plýjnık.
Sapar sońynda «Nur Otan» partııasy Tóraǵasynyń birinshi orynbasary Máýlen Áshimbaev kompanııanyń belsendi qyzmetkerlerine partııa atynan alǵys bildirip, arnaıy marapattady.
