Máýlen Áshimbaev ákimderdi saılaý týraly: Basqarý júıesiniń tıimdiligi artady

NUR-SULTAN. QazAqparat – Senat Tóraǵasy Máýlen Áshimbaev ákimderdi tikeleı halyqtyń saılaýyna múmkindik beretin zańdardyń qabyldanýyna qatysty pikir bildirdi, dep habarlaıdy QazAqparat tilshisi.

«Qabyldanǵan zańdar aýdandyq mańyzy bar qalalar, aýyldar, kentter, aýyldyq okrýgter ákimderiniń tikeleı halyqtyń daýys berýimen saılanýyn bekitip, saılaý protsesiniń tártibin aıqyndaıdy. Sondaı-aq saıası partııalardyń Májilis pen máslıhattarǵa ótý shegin 7-den 5 paıyzǵa deıin tómendetý kózdelip otyr. Munymen qosa, daýys berý bıýlletenderine «bárine qarsymyn» degen baǵan qosylady. Bul elimizdiń qoǵamdyq-saıası ómirindegi asa mańyzdy oqıǵa. Memleket basshysynyń osy bastamasy elimizdiń saıası júıesin odan ári damytýǵa jáne saıası básekelestikti kúsheıtýge aıtarlyqtaı úles qosatyny sózsiz», - dedi M. Áshimbaev Senattyń jalpy otyrysynda.

Onyń paıymynsha, jergilikti ákimderdiń saılaýyn ótkizý basqarý júıesiniń tıimdiligin arttyrmaq.

Aıta keteıik, Senattyń jalpy otyrysynda «Qazaqstan Respýblıkasyndaǵy saılaý týraly» Qazaqstan Respýblıkasynyń Konstıtýtsııalyq zańyna ózgerister men tolyqtyrýlar engizý týraly» QR Konstıtýtsııalyq Zańy men «Qazaqstan Respýblıkasynyń keıbir zańnamalyq aktilerine saılaý máseleleri boıynsha ózgerister men tolyqtyrýlar engizý týraly» Zańy qabyldandy.