Máýlen Áshimbaev 103 jastaǵy anany merekesimen quttyqtady
Osyǵan oraı elimizdiń ár óńirindegi barsha nurotandyqtar ǵasyr jasaǵan jáne jasy júzden asqan aq jaýlyqty ájelerdi merekemen quttyqtaýda.
Jańa aktsııa aıasynda «Nur Otan» partııasy Tóraǵasynyń Birinshi orynbasary Máýlen Áshimbaev jasy 103-ke kelgen Astana qalasynyń turǵyny, eńbek jáne tyl ardageri Dospolova Dana Qulmuhamedqyzyn quttyqtady. Qart ana úıine arnaıy baryp, merekelik kóńil-kúı syılaǵan nurotandyqtarǵa rızashylyǵyn bildirip, aq batasyn berdi.
Dana ájeı 1915 jyldyń 12 qyrkúıeginde Aqmola oblysynyń Qorǵaljyn aýdanyna qarasty Janteke aýylynda týǵan. Jastaıynan eńbekke aralasqan asyl ájeı el tarıhynda erekshe mańyzǵa ıe Transsibir temirjoly magıstraliniń qurylysyna da úles qosqan. Atalǵan magıstraldi salý kezinde apamyz aspaz bolyp jumys istegen eken. Soǵys jyldarynda da tylda eseli eńbek etip, Uly Jeńiske úles qosqan jandardyń qatarynda boldy. Dana ájeıdi barsha nurotandyqtardyń jáne Elbasy, partııa Tóraǵasynyń atynan shyn júrekten quttyqtap, syı-sııapat tartý etken Máýlen Áshimbaev osyndaı apalarymyzdyń ónegege toly ómir joly jas urpaqqa qashanda úlgi ekenin aıtty.
«Meıirimdiliktiń nyshanyndaı bolǵan 8 naýryz Halyqaralyq áıelder kúni ádemiliktiń, izgiliktiń jáne jylylyqtyń merekesi. Soǵan oraı «Nur Otan» partııasy «El analary» degen aýqymdy sharany qolǵa alyp otyr. Osy aktsııa aıasynda partııanyń barlyq fılıaldary ǵasyr jasaǵan jáne jasy júzden asqan ájelerimizdi úılerine arnaıy baryp quttyqtaýda», - deıdi Máýlen Áshimbaev.
Shyn máninde áýletiniń ǵana emes, tutas elimizdiń altyn qazyǵy, bereke-birliktiń uıytqysy bolyp otyrǵan osyndaı apa-ájelerimizdiń ómirinen alar sabaq mol. Sondyqtan nurotandyqtar abyz analardy jeke-dara quttyqtap, aq batalaryn alýdy ózderiniń abyroıly mindeti dep sanaıdy.
«El basyna kún týǵan qıyn-qystaý shaqta etigimen sý keship, keleshek urpaq úshin janyn berip eńbek etken aıaýly jandarǵa qurmet kórsetýdi ózimizdiń azamattyq boryshymyz dep esepteımiz. Óıtkeni bizdiń búgingi baqýatty ómirimizdiń bastaýynda elimizdiń irgesi berik, birligi bekem bolýyna zor eńbek sińirgen osyndaı analarymyz tur», - degen Máýlen Áshimbaev Qazaqstandaǵy barlyq aq jaýlyqty ájeler men aıaýly arýlardy aıtýly merekemen shyn júrekten quttyqtady.
Búginde Qazaqstan boıynsha jasy júzge jetken jáne asqan 415 ájeı bar. Olardyń basym bóligi, ıaǵnı 80-i Ońtústik Qazaqstan oblysynda turatynyn atap ótken jón.
Aıta keteıik, «El analary» aktsııasy elimizdiń barlyq óńirinde ótkizilýde. Sonyń aıasynda nurotandyqtar oblys, aýdan ortalyqtarymen qatar shalǵaıda ornalasqan aýyldyq jerlerdegi apa-ájelerimizdi de arnaıy baryp, merekelerimen quttyqtaýda.
