M.Áýezov teatrynyń Ózbekstanǵa gastroldik sapary bastaldy
TAShKENT. KAZINFORM – M.Áýezov atyndaǵy Qazaq ulttyq drama teatrynyń ujymy Ózbekstan astanasyna gastroldik saparmen keldi, dep habarlaıdy Kazinform agenttiginiń Tashkenttegi menshikti tilshisi Álıhan Asqar.
Ónerge shóldep, teatrdyń tylsymyna boılaýǵa asyqqan ózbekstandyq kórermenniń qarasy qalyń. Asanáli Áshimov bastaǵan ártister ujymyn jergilikti jurt ystyq yqylaspen qarsy aldy.
«Halyqpen halyqty qaýyshtyratyn, tabystyratyn – óner. Qazaqstan men Ózbekstannyń arasyndaǵy baılanys eki eldiń mádenıeti, ádebıeti jáne tarıhy arqyly nyǵaıyp keledi. Ózge de jumystarǵa, 90-ǵa taıaǵan jasyma qaramastan sizdermen kórisip, amandasaıyn degen nıetpen ádeıi kelip otyrmyn. Osylaısha, 17 jyldan keıin Tashkentke at basyn buryp otyrmyz», - dep qushaq jaıa qarsy alǵan ózbekstandyq kórermenderge iltıpatyn bildirdi Asanáli Áshimov.
Bul kúnderi 80-ge jýyq ártis Tashkenttegi mýzykalyq komedııa jáne operetta teatrynyń sahnasynda qoıylymdaryn kórermen nazaryna usynyp jatyr. Alǵashqy týyndy - «Qozy Kórpesh – Baıan Sulý» spektakli. Ǵabıt Músirepovtiń qalamynan týǵan mahabbat dastany tuńǵysh ret 1940 jyly sahnalanǵan. Sodan beri tutas túrki álemine ortaq muraǵa aınalyp, rýhanı qundylyǵyn joǵaltpaı keledi.
«Negizgi rólderdi, ıaǵnı Qozy men Baıannyń beınesin Maǵjan Turys pen Indıra Qulmaǵambetova somdaıdy. Qodardy Ǵalym Ospanov oınaıdy. Al keıin kórermenge usynylatyn «Qorqyttyń kóri» spektaklinde basty róldi Qazaqstannyń Halyq ártisi Dýlyǵa Aqmolda somdaıdy», - dedi M.Áýezov atyndaǵy Qazaq ulttyq drama teatrynyń qoıýshy-rejısseri Elik Nursultan.
Otandyq óner ujymy Tashkentte úsh kún bolyp, «Qozy Kórpesh – Baıan Sulý» týyndysynan bólek, «Qorqyttyń kóri» jáne «Bes boıdaqqa bir toı» spektaklderin qoıady.
Odan keıin gastroldik sapar Qaraqalpaqstan astanasy Nókiste jalǵasady. Ondaǵy kórermen «Qyz Jibek», «Qoshtasqym kelmeıdi» jáne «Mahabbat pen qasiret» atty dramalyq týyndylardy tamashalaı alady.
M.Áýezov atyndaǵy Qazaq ulttyq drama teatrynyń kórkemdik jetekshisi Asanáli Áshimovtiń aıtýynsha, Qaraqalpaqstannan keıin óner ujymy gastroldik saparmen Qyrǵyzstanǵa barmaq.
