200 myńnyń kreslosy 20 mln-ǵa alynǵan: Shymkent ýnıversıtetindegi is sotqa ótti

ASTANA. KAZINFORM — QMA Shymkent qalasy boıynsha departamenti M.Áýezov atyndaǵy Ońtústik Qazaqstan ýnıversıtetinde bıýdjet qarajatyn jymqyrý deregi boıynsha tergeýdi aıaqtady.

Vedomstvo málimetinshe, kúdiktiler qatarynda burynǵy birinshi prorektor, qarjy jáne ákimshilik departamentterdiń dırektorlary, óndiristik-tehnıkalyq bólimniń qoıma meńgerýshisi, sondaı-aq merdiger uıymdardyń basshylary bar.

Kúdiktiler taýarlar is júzinde jetkizilmegen nemese jasandy túrde qymbat baǵamen satyp alynǵan, jalǵan memlekettik satyp alý sharttaryn jasasqan. Baılanysy bar jeke kásipkerler men kommertsııalyq uıymdardyń shottaryna aýdarylǵan qarajat keıinen qolma-qol aqshaǵa aınaldyrylyp, qylmystyq qatysýshylar arasynda bólingen.

— Mysaly, osy shema aıasynda ýnıversıtet basshylyǵy naryqtyq quny 200 myń teńgeden aspaıtyn bir kreslony 20 mln teńgege satyp alǵan. Naqty jetkizilimderdiń bolmaýyn jasyrý maqsatynda kúdiktiler tozǵan taýarlyq-materıaldyq qundylyqtardy balansynan formaldy túrde esepten shyǵaryp, olardy is júzinde paıdalanýdy jalǵastyrǵan. Al esepten shyǵarylǵan múliktiń ornyna kelýi tıis jańa taýarlar múldem jetkizilmegen. Saldarynan memleketke 321 mln teńge kóleminde zalal keltirildi. Tergeý barysynda kúdiktiler 264 mln teńgeni erikti túrde ótedi. Sottyń sanktsııasymen olardyń múlkine — 4 turǵyn úıge, 1 avtokólikke jáne banktik shottardaǵy 40 mln teńge kólemindegi aqshalaı qarajatqa tyıym salyndy. Qylmystyq is sotqa joldandy, — delingen habarlamada.

QR QPK-niń 201-babyna sáıkes ózge aqparat jarııa etýge jatpaıdy.

Budan buryn M. Áýezov atyndaǵy Ońtústik Qazaqstan ýnıversıtetiniń basshysy kúdikke ilingenin jazǵanbyz.