M.Áýezov atyndaǵy teatrda jóndeý jumystary toqtatylǵan joq – mınıstrlik

ASTANA. KAZINFORM – Mádenıet jáne aqparat mınıstrligi birqatar BAQ-ta paıda bolǵan M.Áýezov atyndaǵy teatrdy qaıta jańǵyrtý jumystaryna qatysty aqparatqa túsinikteme berdi.

Mınıstrlik málimetinshe, teatrdy jańartý jumystary toqtamaǵan.

– Birqatar buqaralyq aqparat quraldarynda M.Áýezov atyndaǵy teatrdy qaıta jańǵyrtý jumystarynyń baıaý júrip jatqany nemese toqtatylyp turǵany týraly jarııalanǵan aqparattarǵa baılanysty tómendegini habarlaımyz. Nysandy qaıta jańǵyrtý jumystary toqtatylǵan joq. Qazirgi ýaqytta joba jańa qarjy jylynyń bastalýyn kútýde, sodan keıin belgilengen tártipke sáıkes jumystardy jalǵastyrý úshin qajetti qarajat bólinedi. Nysandaǵy jóndeý jumystary ýákiletti memlekettik organdardyń turaqty baqylaýynda. M.Áýezov atyndaǵy teatrdy qaıta jańǵyrtý onyń tarıhı jáne mádenı qundylyǵyn saqtaýǵa qoıylatyn barlyq talaptardy saqtaı otyryp, tolyq aıaqtalatyn bolady, - dep habarlady mınıstrlikten.

Buǵan deıin Muhtar Áýezov atyndaǵy Qazaq ulttyq akademııalyq drama teatryn jóndeý jumystary 2026 jylǵa deıin aıaqtalatyny habarlanǵan edi.

Almatyda Áýezov teatrynyń qasbetin jańartýdyń taǵy bir nusqasy qaraldy.

Eske salaıyq, 2020 jyly Áýezov teatryna «Ulttyq» mártebesi berildi.