M. Áýezov atyndaǵy Ońtústik Qazaqstan ýnıversıtetiniń basshysy kúdikke ilindi

ShYMKENT. KAZINFORM — M. Áýezov atyndaǵy OQÝ basshysy Qaırat Nurmanbetovti 2 aıǵa «kúzetpen ustaý» túrindegi bultartpaý sharasyna sanktsııa berilgen. Bul týraly Shymkent qalalyq sotynyń baspasóz qyzmeti málimdedi.

Áleýmettik jelide taraǵan aqparatqa súıensek, Shymkent qalasynda ornalasqan M. Áýezov atyndaǵy OQÝ rektorynyń mindetin atqarýshy Qaırat Nurmanbetov para aldy degen kúdikke ilingen. Qazir oqıǵaǵa qatysy bar taǵy eki adamǵa qatysty is qozǵalǵan. Osy aqparat boıynsha resmı pikir bildirgen Shymkent qalalyq sotynyń baspasóz qyzmeti 3 adamǵa «kúzetpen ustaý» túrindegi bultartpaý sharasyna sanktsııa berilgenin málimdedi.

«Shymkent qalasynyń mamandandyrylǵan tergeý sotymen kúdikti Nýrmanbetov Kaıratqa jáne eki tulǵaǵa qatysty 2 aıǵa, ıaǵnı 2024 jylǵy 18 qyrkúıekten 2024 jylǵy 18 qarashaǵa deıin «kúzetpen ustaý» túrindegi bultartpaý sharasyna sanktsııa berilip, kepil mólsheri aıqyndaýsyz qaldyrylǵan. Qaýly zańdy kúshine endi. Al, qalǵan sotqa deıingi tergep-tekserý derekter Qazaqstan Respýblıkasynyń Qylmystyq-protsestik kodeksiniń 201-babynyń talaptaryna saı jarııa etilmeıdi», — delingen vedomstvo aqparatynda.