Matros Baqdáýlet Kúzdibaev áskerı qyzmet pen sýret ónerin ushtastyryp júr
ASTANA. KAZINFORM – Teńiz jaıaý áskeriniń matrosy Qazaqstan tarıhynyń batyrlary týraly kartınalar salyp júr.
Aqtaý garnızonynda teńiz jaıaý áskeriniń desanttyq-shabýyldaý batalonynda merzimdi áskerı qyzmet ótkerip júrgen matros Baqdáýlet Kúzdibaev áskerı qyzmetti shyǵarmashylyqpen ushtastyryp keledi.
Atyraý oblysynan tórt aı buryn Áskerı-teńiz kúshteriniń qataryna shaqyrylǵan ol qazirgi ýaqytta mehanık-júrgizýshi laýazymynda qyzmet atqarady.
Baqdáýlet Kúzdibaevtyń sýret salýǵa degen qyzyǵýshylyǵy bala kezinen qalyptasqan. Mektep jáne stýdenttik jyldary ol stendterdi, plakattar men qabyrǵa sýretterin bezendirgen.
Ásker qataryna kelgennen keıin óz áýestigi týraly komandırlerine aıtyp, olardyń qoldaýyna ıe boldy.
Qazirgi ýaqytta ol qyzmetten bos ýaqytynda sýret salady.
Matrostyń aıtýynsha, basty maqsaty — týǵan áskerı bóliminde ıgi iz qaldyryp, ózinen keıin keletin áskerı qyzmetshilerdiń ulttyq tarıhtyń batyrlaryn tanyp, qurmetteýine úles qosý.
Qyzmet etý barysynda Baqdáýlet Kúzdibaev belgili batyrlar men handardyń beınesin qamtyǵan birqatar aýqymdy týyndylardy dúnıege ákeldi.
Sonymen qatar ol ańyzǵa aınalǵan qolbasshy Baýyrjan Momyshulyna arnalǵan jeke týyndy da saldy.
Matros Baqdáýlet Kúzdibaevtyń úlgisi qatań kún tártibi, jaýyngerlik daıarlyq pen qarqyndy jattyǵýlarǵa qaramastan, áskerde shyǵarmashylyq pen ózin-ózi damytýǵa múmkindik bar ekenin aıqyn kórsetedi.