Mátibulaqta General-leıtenant M.Maıkeevtiń jetekshiligimen áskerı qyzmetshiler kásibı synnan ótedi

ASTANA. QazAqparat - 21-28 qazan aralyǵynda «Otar» 40-áskerı bazasynyń «Mátibulaq» polıgonynda (Jambyl oblysy) jyl saıynǵy QR QK Qurlyq áskerleri áskerı qyzmetshileriniń kásibı synaǵy ótedi, dep habarlady QR Qorǵanys mınıstrliginiń baspasóz qyzmetinen. Synaqqa QR QK Qurlyq áskerleriniń barlyq óńirlik qolbasshylyqtarynan 50-den asa komanda, ıaǵnı 650-ge jýyq túrli mamandyqqa ıe áskerı qyzmetshi qatysady.

Saıystar barysynda áskerı qyzmetshiler shtattyq qarý-jaraqtyń barlyq túrlerin atý qabiletterin kórsetedi. Mergender ózderiniń «dybyssyz soǵys» ónerin kórsetse, al artıllerıster, mınometshiler men granatometshiler kerisinshe belgilengen nysanalardy dúrkiregen atys astyna alatyn bolady. Baılanysshylar men ınjenerler vzvod quramynda arnaıy daıarlyq normatıvterin tapsyrady.

Dene daıarlyǵy boıynsha áskerı-sporttyq normatıvterdi tapsyrýǵa erekshe nazar aýdarylady. Áskerı qyzmetshilerdi beltemirdegi jattyǵýlardyń búkil keshenin oryndaý, 24 kelilik eki kir tasyn kóterý, jalpy áskerı urystyń negizgi ólshemderin modeldeıtin ARD kedergiler jolaǵynan ótý kútip tur. Kúshtilikke arnalǵan jattyǵýlardan keıin tolyq jaraqtanǵan «ekspress-testke» qatysýshylar barlyq qarýlarymen 5 kılometrlik jedel marsh jasaıdy. Saıystyń aıaǵynda komıssııa áskerı ǵylym men jaýyngerlik daǵdydan eń tabystylardy anyqtaıtyn bolady. «Ekspress-test» synaǵy QR QK Qurlyq áskerleri bas qolbasshysy general-leıtenant Murat Maıkeevtiń jetekshiligimen ótedi.