Mátibulaq polıgonyndaǵy áskerı jattyǵý barysynda eki áskerı qaza tapty
ALMATY. 23 aqpan QazAqparat /Erbol Azanbek/ - Búgin Jambyl oblysynyń aýmaǵyndaǵy «Mátibulaq» polıgonynda ótip jatqan QR Qurlyq áskerleriniń kezekti qysqy oqý-jattyǵýlary kezinde eki áskerı qyzmetker qaza tapty.
Osyndaı oqıǵanyń bolǵandyǵyn bizben áńgimesinde QR Qorǵanys mınıstrliginiń baspasóz qyzmetkeri Oksana Parpýra rastady.
Onyń málimetinshe, qazirgi kezde qyzmettik tekserý júrgizilýde. «Oqıǵanyń bolǵandyǵy ras. Alaıda bizdiń qolymyzda naqty aqparat joq. Qazirgi kezde oqıǵa ornynda arnaıy komıssııa jumys isteýde», - dedi ol.
Esterińizge sala keteıik, búgingi shara brıgadalyq-taktıkalyq jattyǵýlardyń sheshýshi kezeńi bolatyn. Oǵan Qurlyq áskerleriniń desanttyq-shabýyldaýshy, mehanıkalandyrylǵan jáne artıllerııalyq brıgadalary qatysyp, naqty jaýyngerlik atystardy pysyqtaýy tıis edi. Naqtylanbaǵan aqparattarǵa súıensek, áskerıler mınaǵa uryný saldarynan qaza tapqan.
