Mátibulaq polıgonynda tank bıatlony boıynsha jarysqa daıyndyq bastaldy (FOTO)

ASTANA. QazAqparat - «Otar» áskerı bazasynyń Mátibulaq polıgonynda 21450 áskerı bóliminiń tank ekıpajdary oq atý jattyǵýlaryna kiristi, dep habarlaıdy QR Qorǵanys mınıstrliginiń baspasóz qyzmeti.

Onda T-72 tankisimen oq atý jáne áskerı tehnıkany júrgizý sharalary uıymdastyrylady. Tank bıatlonyna daıarlyq sheńberinde tank bólimsheleri dalalyq shyǵý jaǵdaılarynda atý daıarlyǵy men jaýyngerlik mashınalardy júrgizý boıynsha sabaqtaryn ótkizedi.

Esterińizge sala ketsek, 2013 jyly Máskeý túbindegi Alabıno polıgonynda ótken tuńǵysh tank bıatlony boıynsha halyqaralyq jarysynda qazaqstandyq áskerı qyzmetshiler komandasy Belarýs jáne Armenııa tank ekıpajdaryn sońdaryna qaldyryp, ekinshi oryndy ıelengen bolatyn. Aǵymdaǵy jyly bıatlon boıynsha kórsetkishterdi jaqsartý maqsatynda jáne jeńimpazdar qataryna ený úshin, ekıpajdyń árbir múshesi óziniń praktıkalyq biliktilikterin, atap aıtqanda júrgizýshi-mehanıkter - tankimen túrli kedergileri bar joldardan ótý, nysanashy - kóringen jáne qozǵalmaly nysanaǵa birinshi bolyp barynsha dáldikpen atý, tank komandırleri - NSVT zeńbireginen joǵary dáldikpen oq atý biliktilikterin jattyqtyrýda. Tank qarý-jaraǵynan atý men jaýyngerlik tehnıkalardy júrgizýden basqa, ekıpaj quramy dene daıarlyǵymen de aınalysady. Tank bıatlonyna daıarlyq barysynda 21450 áskerı bóliminiń 3-shi tank batalonynda 2-shi vzvodtyń 9-shy tank rotasy vzvod komandıri leıtenant T.Doshanovtyń jetekshiligimen 9 tank vzvodynyń ishinde eń joǵary kórsetkishterdi kórsetti.