Materıaldyq emes qundylyqtardy tasymaldaýshy tildiń tazalyǵyna kóńil bólgen mańyzdy

Búgin QR Parlamenti Senatynyń jalpy otyrysynda depýtattar «Materıaldyq emes mádenı murany qorǵaý týraly konventsııany ratıfıkatsııalaý týraly» zań jobasyn talqylaý barysynda senator Qýanysh Aıtahanov osylaı málimdedi.

«Sońǵy jyldary Elbasynyń bastamasymen qolǵa alynǵan «Mádenı mura» baǵdarlama aıasynda materıaldyq emes mádenı muralardy izdestirý, zertteý, jınaqtaý, qorǵaý sekildi kóptegen ıgi ister atqarylýda. Mádenıet mınıstrliginiń basshylyǵymen «Qazaqtyń 1000 áni», «Qazaqtyń 1000 kúıi» jınaqtalyp, ultymyzdyń altyn qoryna aınaldy. 100 tomdyq babalar sózi jaryqqa shyǵýda. Endi batyrlar jyry da jınaqtalyp jatyr. Bul baǵyttaǵy ıgi jumystary úshin Mádenıet mınıstrliginiń basshylaryna raqmet», - dedi senator.

Sonymen qatar, zań jobasyna toqtalǵan Qýanysh Aıtahanov mınıstrliktiń áli de bolsa dúnıejúzilik mura tizimine ulttyq qundylyqtardy engizý jumystaryn barynsha jandandyrýy qajettigin atap ótti. «Máselen, «Alpamys batyr» eposyn ózbekter, túrkimender ázerbaıjandar da ıelenýde. Eki-úsh jyl buryn Tashkent qalasynda Alpamys batyrdyń 1000 jyldyǵy toılandy. Bizde ondaı toı toılanbaq túgili batyr jaıynda konferentsııa da ótken joq. Al qymyzdy nemister, aıtys ónerin qyrǵyzdar ıelenýge barynsha at salysýda. Endeshe bizge de qyrýar jumystar atqaryp, ábjil qımyldaý kerek. Bizdiń uly dalamyzdaǵy materıaldyq qundylyqtar álemdik qundylyqtardy baıytatynyna kúmán joq», - dedi depýtat.

Budan bólek, senator qazaqtyń ulttyq qundylyqtaryn shetelge keńirek tanystyrý úshin til biletin mamandardyń asa qajettigin atap ótti.

«Materıaldyq emes qundylyqtardy tasymaldaýshy - bul til. Sondyqtan da tildiń tazalyǵyna, ony tazartýǵa da erekshe kóńil bólý qajet. Óıtkeni, sońǵy ýaqytta basqasyn aıtpaǵanda ulttyq baspasózde de qazaq tiliniń shubarlanýyn baıqaıtyndaımyz. Buǵan Mádenıet mınıstrligi kóńil aýdarsa ıgi», - dedi Q. Aıtahanov.