Matchtaǵy tártipsizdik: Germanııada 60-tan astam polıtsııa qyzmetkeri jaraqat aldy

ASTANA. KAZINFORM — Ekinshi lıganyń «Magdebýrg» pen Drezdenniń «Dınamo» klýbtary arasyndaǵy fýtbol matchy kezinde jappaı tártipsizdik oryn alyp, saldarynan 64 polıtsııa qyzmetkeri jaraqattandy, dep habarlaıdy DW.

Saksonııa-Anhalt ishki ister mınıstrliginiń málimetinshe, 17 qyzmetker aýyr jaraqat alyp, aýrýhanaǵa jatqyzylǵan. Oqıǵa birinshi taımnyń aıaqtalýyna az ýaqyt qalǵanda, jergilikti jankúıerlerdiń qonaqqa kelgen kórermender otyrǵan sektorǵa ótýge árekettengen kezinde bastaldy. Polıtsııa tártipsizdikti toqtatýǵa tyrysqanymen, jaǵdaı qaqtyǵysqa ulasty.

Quqyq qorǵaý organdarynyń qyzmetkerlerine otshashý, tas pen metall tosqaýyldar, káriz qaqpaqtary men brýschatka laqtyryldy. Eki komandanyń jankúıerleri otshashýdy atyp, matchtyń ýaqytsha toqtatylýyna sebep boldy.

Stadıondaǵy tártipsizdikten basqa, qalanyń barlyq aýmaǵynda tonaý jáne múliktik zalal týraly habarlandy. Polıtsııa basshysy Tamara Zıshan tártipsizdikti qatań aıyptap, arnaıy jumys toby tergeýdi bastaǵanyn jarııalady. Polıtseıler odaǵy da jankúıerlerdiń áreketin synǵa alyp, mundaı árekettiń fýtboldy qoldaýǵa esh qatysy joq ekenin atap ótti.

Stadıonda shamamen 28 000 kórermen boldy jáne júzdegen polıtsııa qyzmetkerleri, sonyń ishinde Germanııanyń basqa aımaqtarynan kelgen kúshter qaýipsizdikti qamtamasyz etti. Match 2:1 esebimen «Dınamo» komandasynyń jeńisimen aıaqtaldy.

Buǵan deıin Grýzııadaǵy tártipsizdikter kezinde 14 polıtseı jaraqat alǵan bolatyn.