Match qıynǵa soqty, bastysy jeńis bizde – Ádil Beketaev

ASTANA. KAZINFORM – Qazaqstan hokkeı quramasynyń oıynshysy Ádil Beketaev qysqy Azııa oıyndaryndaǵy otandyq erler komandasynyń tuǵyrly jeńisinen keıin áseri týraly aıtyp berdi.

- Kóńil kúıdi jetkizý múmkin emes, eldiń týyn alyp shyqqan men úshin úlken jaýapkershilik boldy. Týdy alyp shyqqan sportshylar altyn júlde almaıdy degendi estip, qobaljyǵanym bar. Qazir ıyǵymnan júk túskendeı bolyp turmyn. Bul eldiń jeńisi, jankúıerlerdiń jeńisi, jaqyndarymnyń jeńisi. Sezimdi aıtyp jetkizý múmkin emes, - dedi Ádil Beketaev Kazinform agenttiginiń tilshisine suhbat bere turyp.

Osy oraıda qysqy Azııa oıyndarynyń jeńimpazy jeńisin otbasy men jaqyn jandaryna arnaıtynyn jetkizdi.

- Ár matchtan keıin jeńiske jeteıin, jetpeıin únemi alǵash bolyp otbasym, jaqyndarym habarlasady, qoldaý kórsetedi. Jalpy match qıynǵa soqty, bastysy jeńis bizde, - dep tolyqtyrdy jerlesimiz.

Buǵan deıin habarlaǵanymyzdaı, Azıada-2025 qysqy oıyndarynda hokkeıden Qazaqstan erler quramasy chempıon atandy.

Fınalda, qazaqstandyq jigitter Japonııa quramasymen kúsh synasty.

Aıta keteıik, Ádil Beketaev qysqy Azııa oıyndarynyń ashylý saltanatynda elimizdiń týyn alyp shyqty. Ol Qazaqstan Respýblıkasynyń hokkeıden sport sheberi, jastar arasyndaǵy álem chempıonatynyń qola júldegeri jáne jeńimpazy.

Sondaı-aq Ádil Beketaev bizdiń agenttik tilshisimen Qytaıǵa qarsy oıyn týraly aıtqan edi.