Match kezinde ajal qushqan fýtbolshynyń otbasy 100 myń dollar ótemaqy alady
ASTANA. QazAqparat - Aljır Fýtbol federatsııasy (FAF) jergilikti «JS Kabılııa» klýbynyń shabýylshysy Albeta Ebosseniń otbasyna 100 myń dollar kóleminde ótemaqy tóleýge kepildik berdi.
Bul týraly sheteldik BAQ atalǵan federatsııanyń baspasóz qyzmetine silteme jasap habarlady.
«FAF, Kásibı fýtbol lıgasy jáne klýb 100 myń dollar kóleminde ótemaqy tóleý týraly ýaǵdalasty. Ol qaza tapqan fýtbolshynyń otbasyna aýdarylady. Buǵan qosa, kelisimsharttyń sońyna deıingi oıynshynyń barlyq jalaqysy da tólenetin bolady», - delingen habarlamada.
Aıta keteıik, qaıǵyly oqıǵa Aljır chempıonaty kezinde «JS Kabılııa» men «ÝSM Aljır» arasyndaǵy kezdesýde oryn alǵan edi. Oıyn barysynda qonaqtar alań qojaıyndaryn 2:1 esebimen tize búktirgen. Kezdesý aıaqtalǵannan keıin oıyn nátıjesine kóńili tolmaǵan jankúıerler fýtbolshylarǵa túrli zattar laqtyrdy. Sondaı sáttiń birinde óz komandasyna jalǵyz gol syılaǵan Ebosseniń basyna tas tıdi. Osydan keıin 24 jastaǵy kamerýndyq fýtbolshy es jımastan aýrýhanada ómirden ozdy.
Aljır Іshki ister mınıstrligi atalǵan iske baılanysty tergeý amaldaryn júrgizýde.
Ebosse 2013 jyldan «JS Kabılııa» sapynda óner kórsetken edi. Ol ótken maýsymda qarsylastarynyń qaqpasyna 17 dop soǵyp, Aljır chempıonatynyń eń úzdik shabýylshysy atanǵan.
