Mataevtardyń soty Astanada ótedi

Búgin Astanadaǵy № 2 Esil aýdandyq soty osyndaı sheshim shyǵardy. «Qylmystyq is boıynsha basty sot otyrysy Astana qalasyndaǵy № 2 Esil aýdandyq sotynyń № 2015-shi sot zalynda 2016 jyldyń 23-inshi tamyzynda saǵat 10.00-de ótedi. Aıyptalýshylarǵa qatysty bultartpaý sharasy úıqamaq kúıinde qaldyrylsyn»,- dep habarlady sotqa tóraǵalyq etýshi sýdıa Aqbolat Qurmantaev.

Ákeli-balaly Mataevtardyń qorǵaýshylary - Mádına Bakıeva, Andreı Petrov jáne Serikqalı Mýsınder sotqa jeti ótinish bildirdi. Olar sot zalyna kompıýter ákelýdi, kardıolog-dárigerdiń otyrysqa qatysýyn, ákeli-balaly Mataevtardy úıqamaqtan kepilge bosatýdy, qylmystyq is materıaldary boıynsha ekonomıkalyq saraptama júrgizýdi, ózderi qorǵaıtyn adamdardy qolaıly páterge aýystyrýdy, sottyń qylmystyq isti qaraý merzimin uzartýdy jáne basty sot otyrystaryn Almaty qalasynda ótkizýdi surady.

Aldyn-ala sot tyńdaýynda qorǵaýshy tarap aıyptalýshylarǵa qatysty bultartpaý sharasyn ózgertýdi: úıqamaqtan kepilge bosatýdy surady. Málim bolǵanyndaı, sottalýshylardyń týystary men jaqyndary 1 mln-nan astam aqsha jınapty. «Jasynyń ulǵaıǵanyn, otbasylyq jaǵdaıyn eskere otyryp, meniń qorǵaýymdaǵy adamnyń buryn qylmystyq jaýapkershilikke tartylmaǵanyn, sondaı-aq tergeýden qashý nemese jaltarýǵa árekettenbegenin eskere kele, Seıitqazy Beısenǵazyuly Mataevqa qatysty bultartpaý sharasyn - úıqamaqtan kepilge bosatýǵa ózgertýdi suraımyn. Mataevtar otbasynyń týystary men jaqyndary kepil esebinde sottar ákimshisiniń esep-shotyna 500 AEK kóleminde aqsha aýdardy, bul shamamen 1,07 mln. teńge. Buǵan qosa, týystary men jaqyndary quny 6 mln. teńgeden asatyn «Toyota Land Cruizer» avtokóligin qosymsha kepil esebinde qabyldaýdy ótinedi»,- dep habarlady sotta Andreı Petrov. Qorǵaýshylar Áset Mataevqa qatysty da osyǵan uqsas ótinishhat daıyndapty. Olar Á. Mataevtyń 500 aılyq eseptik kórsetkish kóleminde kepil berýge daıyn ekenin aıtty.  
Alaıda memlekettik aıyptaýshy Erjan Quraqbaev Seıitqazy jáne Áset Mataevtardy kepilge bosatý týraly ótinishti qanaǵattandyrýǵa eshqandaı negiz joqtyǵyn málimdedi. «Qazirgi kezge deıin S. Mataev keltirilgen shyǵyndy ótegen joq, tergeýge kómek kórsetken joq. Sol sebepti dál qazir Seıitqazy jáne Áset Mataevtardy úıqamaqtan kepilge bosatýǵa eshqandaı negiz joq»,- dedi E. Quraqbaev. Aıta ketelik, bir saǵatqa jýyq keńesý bólmesine ketken sot bul ótinishti qanaǵattandyrǵan joq.

Eske sala ketsek, sotqa deıingi tergeýden málim bolǵanyndaı, Seıitqazy jáne Áset Mataevtarǵa «aldaý men senimdi teris maqsatqa paıdalaný jolymen Investıtsııalar jáne damý mınıstrliginiń Baılanys, aqparattandyrý jáne aqparat komıteti men «Qazaqtelekom» AQ-nyń bıýdjetiniń 300 mln. teńgesin urlady» degen aıyp taǵylýda.  Sondaı-aq tergeý málimetteri boıynsha Seıitqazy Mataev 2011-2015 jyldar aralyǵynda 216 952 683 teńgeniń salyǵyn tóleýden jaltarǵan. Sotqa deıingi tergeý kezinde Seıitqazy jáne Áset Mataevtar túsinik berýden bas tartty.