Mataevtardyń isi: Prokýror aıyptaý aktisin oqydy
ASTANA. QazAqparat - Búgin Astanadaǵy №2 Esil aýdandyq sotynda Seıitqazy jáne Áset Mataevtardyń qylmystyq isi boıynsha basty sot otyrysy bastaldy. Sotqa tóraǵalyq etýshi sýdıa Aqbolat Qurmantaev áýeli basty aıyptalýshylar - S. jáne Á. Mataevtardan, olardyń qorǵaýshylarynan qylmystyq istegi dálelderdi alyp tastaýǵa qatysty ótinishhattarynyń bar-joǵyn surap bildi. Sýdıanyń suraǵyna: «Ótinishhat joq» degen jaýap qaıtaryldy. Odan áride sýdıa aıyptaý aktisin oqý úshin prokýrorǵa sóz kezegin berdi.
Memlekettik aıyptaýshy Erjan Quraqbaev sot otyrysynda: «2011 jyldyń basynda «Ulttyq baspasóz klýby» qoǵamdyq birlestiginiń prezıdenti Seıitqazy Mataev paıdakúnemdik qyzyǵýshylyqpen zańsyz jolmen baıýdy kózdeýdi oılaıdy. Óz qolynda bar aqparattardy taldaı jáne salystyra kele, S. Mataev «Qazaqtelekom» AQ-nyń qarajatyn qymqyrýdyń jolyn oılastyrady. Osy maqsatta óziniń bedelin paıdalana otyryp «Qazaqtelekom» AQ-nyń qyzmeti jóninde jarnamalyq-aqparattyq materıaldardy jaryqqa shyǵarý úshin «Ulttyq baspasóz klýby» qoǵamdyq birlestigi arasynda kelisim-shart jasaıdy. Alaıda keıinirek, jaryqqa shyqqan materıaldardyń qyzmet qunyna kelgende «Qazaqtelekom» AQ-nyń qyzmetkerlerin jańylystyryp, zańsyz jolmen aqsha alady. Sondaǵy jymqyrylǵan aqshanyń kólemi - 143 mln. teńge»,- dep habarlady.
Memlekettik aıyptaýshynyń aıtýynsha, Seıitqazy Mataev 2010-2015 jyldar aralyǵynda ózimen aldyn-ala sybaılasqan adamdardyń tobymen birlese otyryp, memlekettik satyp alý salasynda bıýdjet qarajatyn qymqyrǵan. Sonyń bárinde aldaý men senimge qııanat etý jolymen áreket jasaǵan. Jarnamalyq-aqparattyq qyzmet salasynda kásipkerlikpen aınalysý maqsatynda S. Mataev 2008 jyly 19 maýsymda Almaty qalasynyń ádilet organdaryna «QazTAG» halyqaralyq aqparat agenttigi» jaýapkershiligi shekteýli seriktestigin tirkeıdi. «Óziniń qolynda bar aqparattaryn taldaı jáne salystyra otyryp, Mataevtyń Mádenıet jáne aqparat mınıstrliginiń Aqparat jáne muraǵat komıtetiniń laýazymdy tulǵalarynyń ózine degen senimine qııanat etý jáne aldaý jolymen memlekettik aqparattyq saıasatty júrgizýge arnalǵan bıýdjet qarajatyn urlaý jónindegi aram nıeti týyndaıdy»,- dedi sot otyrysynda E. Quraqbaev.
Onyń jarııa etkenindeı, Baılanys, aqparat jáne aqparattandyrý komıteti memlekettik aqparattyq saıasatty nasıhattaýǵa tender ótkizedi. Sol tenderdi jeńip alýǵa úmitkerlerdiń arasynda «QazTAG» halyqaralyq aqparattyq agenttigi de bolǵan. Aldyn-ala jasalǵan kelisim boıynsha, tenderlik qujattar bir ǵana Áset Mataev basshylyq etetin «QazTAG» agenttigi jeńiske jetetindeı etip jasalady. Alaıda, bul osy saladaǵy zańnamany óreskel buzý bolyp tabylady. Kelisim-shart boıynsha, «QazTAG» memlekettiń ishki jáne syrtqy saıasaty, qarjylyq sala ınstıtýttaryn nyǵaıtý, elimizdiń qoǵamdyq-saıası jáne áleýmettik-ekonomıkalyq ómiri týraly kólemdi materıaldardy jaryqqa shyǵarýy tıis bolǵan. Máselen, 2013 jyly agenttikten kún saıyn kem degende 5-7 saraptamalyq maqala, aptasyna kem degende úsh ret osy taqyryptarda ártúrli suhbattar shyǵarý talap etilgen. Іs júzine kelgende bir-bir maqala, suhbattar ǵana jarııalanǵan. Tipti keıde múldem eshqandaı materıal jarııalanbaǵan. Ol az bolǵandaı-aq, atqarylǵan jumystardyń aktileri tekserilmeı, ánsheıin «qol qoıýdan» ótip otyrǵan. Saıyp kelgende, «QazTAG» halyqaralyq aqparattyq agenttigi arqyly urlanǵan aqshanyń kólemi 169 mln. teńgeni qurady.
Buǵan qosa, S. Mataev 2011-2015 jyldar aralyǵynda 216 952 683 teńgeniń salyǵyn tólemedi dep aıyptalyp otyr. Aıta ketelik, buǵan deıin málim bolǵany - S. Mataev kórsetilgen somanyń shamamen 47. mln. teńgesin memleketke tólep qaıtardy.
Ámirlan Álimjan
