Mataevtar isi. Kýágerler Ulttyq baspasóz klýbynyń astyrtyn áreketteri týraly aıtty
ASTANA. QazAqparat - Astana qalasynyń №2 Esil aýdandyq sotynda «Mataevtar isi» boıynsha sot otyrysy jalǵasyp jatyr. Sot qylmystyq is boıynsha kýágerlerden jaýap alýda. Búgingi otyrysta «Qazaqtelekom» AQ-na qatysty epızod boıynsha elimizdegi baspa BAQ-tardyń ókilderi sotqa túsinik berdi.
«Ulttyq baspasóz klýby» qoǵamdyq birlestiginiń «Qazaqtelekom» AQ-nyń qyzmeti týraly jarnamalyq materıaldardy «Ekspert-Qazaqstan» jýrnalyna shyǵarýǵa eshqandaı qatysy bolǵan joq. Biz barlyq jumystardy «Qazaqtelekom» AQ-men ózimiz júrgizdik»,- dep habarlady búgingi sot otyrysynda kýágerlerdiń biri, «Ekspert-Qazaqstan» JShS-niń jarnama bóliminiń menedjeri Svetlana Semenova. «Men menedjer retinde tikeleı «Qazaqtelekom» AQ-men jumys júrgizdim. Al Ulttyq baspasóz klýbynyń bul jumysqa eshqandaı qatysy bolǵan joq. Tek aıtarym, men daıyn materıaldardy, esep-qısaptardy, atqarylǵan jumystardyń aktilerin Ulttyq baspasóz klýbyna jiberip otyrdym»,- dep áńgimeledi S. Semenova.
Osy kýágerdiń aıtýyna qaraǵanda, «Qazaqtelekomnyń» qyzmeti týraly materıaldar «Ekspert-Qazaqstan» jýrnalyna jarııalanǵannan keıin qujattar tizimin ol esepshiler bólimine tapsyrǵan. Ol qujattardyń ishinde jýrnaldyń shyǵatyn kúni, aıy, jyly týraly derek, jarnama berýshiler, jarnamanyń kólemi jáne baǵasy jónindegi málimetter bolǵan. Esep qujattarynda kórsetilgendeı, negizgi jetkizýshi - «Ulttyq baspasóz klýby» qoǵamdyq birlestigi týraly málimetterdi «Qazaqtelekom» AQ-nyń buqaramen baılanys basqarmasynyń qyzmetkerlerinen alǵan. Saıyp kelgende, kýáger Svetlana Semenova «Ulttyq baspasóz klýbynyń» tender ótkizilmeı turyp, qyzmetterdi jetkizýshi bolyp aldyn-ala belgilenip qoıǵanyn aıtty.
Aıta ketelik, buǵan deıingi sot otyrystarynyń birinde túsinik bergen «Qazaqtelekom» AQ-nyń strategııalyq basqarý jónindegi bas dırektory Batyr Mahanbetajıev memlekettik satyp alý erejeleri boıynsha qosalqy merdigerlikke berýdi yqshamdaý qajettigin aldyn ala bilse de, Seıitqazy Mataevtyń usynysymen keliskenin habarlady. Sóıtip ol óz qyzmetkerlerine tenderlik qujattardy belgilengen tártipke sáıkes daıyndaýǵa S. Mataevqa qol ushyn sozýǵa tapsyrma beredi.
Ekinshi kýáger - «Tolǵaý» JShS-niń bas dırektory Aleksandr An «Qazaqtelekomnyń» qyzmeti týraly jarnamalyq materıaldar týraly esep-qısap qujattary tender ótkizilmeı-aq «Ulttyq baspasóz klýby» qoǵamdyq birlestigine jiberilip otyrǵanyn ashyq aıtty. «Qazaqtelekom» AQ-nyń qyzmeti týraly materıaldardy basylymdarǵa shyǵarýmen «Tolǵaý» JShS-niń qyzmetkerleri aınalysty. Meniń biletinim, tender ótkizilmeı turyp, ıaǵnı «Qazaqtelekom» AQ-y men «Ulttyq baspasóz klýby» QB-niń arasynda shart jasalǵanǵa deıin, esep-qısap qujattary «Ulttyq baspasóz klýbyna» jiberiletin»,- dep túsindirdi istiń mánisin A. An.
Buǵan qosa, tergeý barysynda anyqtalǵandaı, «Ulttyq baspasóz klýby» qoǵamdyq birlestiginiń prezıdenti Seıitqazy Mataev basylymdarǵa jarnamalyq materıaldar shyǵarý boıynsha kórsetiletin qyzmetterdiń qunyn kóterip jibirgen. Sóıtip kóterilgen baǵanyń aıyrmasynan túsken qarajatty qolma-qol aqshaǵa aınaldyryp, óziniń jeke qajettilikterine jaratqan.
Tergeýdiń nusqasy boıynsha, «Ulttyq baspasóz klýby» qoǵamdyq birlestiginiń prezıdenti Seıitqazy Mataev 2011-2013 jyldar aralyǵynda qyzmet túrleriniń qunyn kóterý jolymen «Qazaqtelekom» AQ-na jarnamalyq-aqparattyq materıaldardy ornalastyrýǵa bólingen 398 mln. teńgeniń 143 mln-yn urlaǵan.
Ámirlan Álimjan
