Mataevtar isi: Kýáger «Ulttyq baspasóz klýby» qyzmetkerlerimen eńbek shartyn jasamaǵanyn aıtty
ASTANA. QazAqparat - Astana qalasyndaǵy №2 Esil aýdandyq sotynda Seıitqazy jáne Áset Mataevtardyń isi boıynsha kýágerlerden jaýap alý odan ári jalǵasýda. Búgingi sot otyrysynda kýágerler «Salyqtan jaltardy» degen ekinshi epızod boıynsha sotqa túsinik berdi.
«Men 2007 jyly «Ulttyq baspasóz klýby» qoǵamdyq birlestigine jumysqa qabyldanǵanda qandaı da bir qujattarǵa qol qoıdym. Biraq onyń eńbek sharty ekeni esimde joq. Biletinim, meniń jalaqymnan zeınetaqy qoryna aqsha aýdarylǵan emes»,- dep málimdedi kýáger, «Ulttyq baspasóz klýby» qoǵamdyq birlestiginiń shtattan tys qyzmetkeri Qudaıberdi Májenov.
«Seıitqazy Mataevpen 2007 jyly tanystym. Ol meni «Ulttyq baspasóz klýbyna» jumysqa shaqyrdy. Men Astanadaǵy «Ulttyq baspasóz klýbynyń» ǵımaratyndaǵy bólmelerdi jalǵa berý mindetin atqardym. Maǵan Mataev ár úsh jyl saıyn jeke senimhat berip otyrdy. Alǵashynda aı saıyn 135 myń teńge, keıinirek 160-165 myń teńge aldym. 2015 jyldan bastap eńbekaqym 170 myń teńgege kóbeıdi», - dedi kýáger sottaǵy sózinde. Onyń aıtýynsha, «Ulttyq baspasóz klýby» qoǵamdyq birlestigi 14 adamǵa jalaqy tóleıdi. Biraq eshkimmen arnaıy eńbek sharty jasalmaǵan.
Ol prokýrordyń: «Siz «Ulttyq baspasóz klýby» qoǵamdyq birlestigimen eńbek shartyn jasadyńyz ba?» degen suraǵyna: «Esimde joq. 2007 jyly qandaı da bir qujattarǵa qol qoıǵanmyn»,- dep óz sózine kúmánmen jaýap qaıyrdy. Atap aıtarlyǵy, Qudaıberdi Májenov kúni búginge deıin «Ulttyq baspasóz klýby» qoǵamdyq birlestiginiń Astanadaǵy ǵımaratynda ákimshi bolyp jumys isteıdi.
Seıitqazy Mataev Q. Májenovke ǵımarattardy ustap turýǵa aı saıyn qomaqty qarajat aýdaryp otyrǵan. Birde onyń kólemi 970 myń teńgeni, al keıde 1 mln 500 myń teńgeni quraǵan. Biraq ol bul aqshalardyń «Ulttyq baspasóz klýby» qoǵamdyq birlestiginen túskenin bilmegen. Aıtarlyǵy, ol aqsha ókildiktiń qyzmetkerlerine aılyq eńbekaqy retinde berilgenimen, azamattyq tulǵalardyń barlyǵy qoǵamdyq birlestiktiń is júzindegi ne múshesi, ne qyzmetkeri bolmaǵan.
«Ulttyq baspasóz klýbynda» shtattan tys kýrer bolyp jumys istegen Mıra Imaǵanbetova da eńbek shartyn jasamaǵan. Soǵan qaramastan aı saıyn 150 myń teńge jalaqy alǵan. Resmı jumysqa tirkelmegendikten zeınetaqy qoryna eshqandaı aqsha aýdarmaǵan. Jeke tabys salyǵan da tólemegen. «Meni jumysqa qabyldaǵanda eshkim qujat suramady. Aptasyna eki-úsh ret jumysqa bardym. Negizinen «Ulttyq baspasóz klýbynyń» qujattaryn qala ishindegi mekemelerge jetkizdim»,- dep áńgimeledi sotta M. Imaǵanbetova. Aıtarlyǵy, 2011 jyly onyń banki kartochkasyna aı saıyn 150 000 teńge túsip turǵan. Ol bul aqshanyń «Ulttyq baspasóz klýbynan» ekenin bilmepti. Óıtkeni qoǵamdyq birlestik zeınetaqy qoryna aqsha aýdarmaǵan, jeke tabys salyǵyn, áleýmettik salyqty tólemegen. Saıyp kelgende, mekemege eshqandaı eńbek shartyn jasamaı jumysqa qabyldanǵan, tipti jumysqa qabyldaý týraly eshqandaı buıryq shǵarylmaǵan.
Tergeýdiń nusqasy boıynsha, Seıitqazy Mataev 2011-2015 jyldary óziniń týystary men «Ulttyq baspasóz klýbynyń» múshesi bolyp tabylmaıtyn basqa da azamattardyń kartochkasyna 264, 7 mln. teńge aýdarǵan. Alaıda S. Mataev jaýapty tulǵa retinde ol aqshadan jeke tabys salyǵyn tóleýi tıis bolǵan, ol úshin deklaratsııa tapsyrý mindetti. Saıyp kelgende, tergeýdiń nusqasy boıynsha Seıitqazy Mataev 2011-2015 jyldary 300 mln. teńgeden astam salyq tóleýden jaltarǵan.
