Mataevtar isi: Kýáger Seıitqazy Mataevtyń tabysyn jasyrý arqyly salyqtan jaltarǵanyn aıtty
ASTANA. QazAqparat - Astana qaalsyndaǵy №2 Esil aýdandyq sotynda Seıitqazy jáne Áset Mataevtardyń isi boıynsha sot otyrysy odan ári jalǵasýda.
Búgin sotqa shaqyrylǵan kýágerler «Salyq tóleýden jaltardy» degen ekinshi epızod boıynsha sotqa túsinik berdi. «Seıitqazy Mataev óziniń tabysyn jasyrý nıetimen tek «kommertsııalyq emes uıymnyń tabysy» degen deklaratsııa tapsyryp kelgen. Zań boıynsha qyzmettiń bul túrine salyq salynbaıdy. «Ulttyq baspasóz klýby» qoǵamdyq birlestigi qurylǵannan beri onyń S. Mataev degen jalǵyz ǵana qyzmetkeri, jetekshisi bolǵan»,- dep habarlady sotta Almaty qalasynyń memlekettik kirister departamenti aýdıt basqarmasynyń bas mamany Nurlan Serkeev.
«Men «Ulttyq baspasóz klýby» QB-ne salyq tóleýi boıynsha tekserý júrgizdim. Ol úshin áýeli S. Mataevtan salyq tólemderi boıynsha qujattardy suradym. S. Mataev maǵan «Ulttyq baspasóz klýby» qoǵamdyq birlestiginde esepshi qyzmeti joq ekenin, sol sebepti býhgalterlik esep-qısap júrgizilmeıtinin aıtty»,-dedi kýáger sottaǵy sózinde. Onyń aıtýynsha, salyq tólemderi boıynsha tekserýden anyqtalǵandaı, Seıitqazy Mataev zańdy tulǵa retinde bıýdjetke 168 730 897 myń teńge korporatıvtik tabys salyǵyn tóleýden jaltarǵan. Sonymen qatar, jeke tabys salyǵy boıynsha 2011- 2015 jyldary 65 420 741 teńge, rezıdent bolyp tabylmaıtyn tulǵalar úshin 2011- 2014 jyldary 8 578 748 teńge tólenbegen.
«Ulttyq baspasóz klýby» qoǵamdyq birlestigi jýrnalıstıka salasynda qyzmet etetin kommertsııalyq emes uıym retinde qurylǵan. Osyǵan sáıkes, «Ulttyq baspasóz klýby» qoǵamdyq birlestiginiń jetekshisi Seıitqazy Beısenǵazyuly Mataev «qoǵamdyq birlestik kommertsııalyq qyzmetpen aınalyspaıdy» degendi rastap, kommertsııalyq emes uıym retinde deklaratsııa tapsyryp otyrǵan. Biraq «Ulttyq baspasóz klýby» Astana jáne Almaty qalalarynda ǵımarattardy jalǵa berip, aqparattyq materıaldardy ázirleýmen aınalysqanyn, baspasóz máslıhattaryn ótkizgenin, teledıdar efırinen jáne baspa BAQ-tardan aqparat taratqanyn, sonymen qatar baılanys qyzmetin kórsetkenin eskersek, bulardan tabys tapqanyn kóremiz. Alaıda qoǵamdyq birlestiktiń kommertsııalyq emes uıym mártebesin paıdalanyp,is júzindegi tabystaryn jasyrǵan»,- dedi kýáger sotta.
Tergeýdiń nusqasy boıynsha, Seıitqazy Mataev 2011-2015 jyldary óziniń týystary men «Ulttyq baspasóz klýbynyń» múshesi bolyp tabylmaıtyn basqa da azamattardyń kartochkasyna 264, 7 mln. teńge aýdarǵan. Alaıda S. Mataev jaýapty tulǵa retinde ol aqshadan jeke tabys salyǵyn tóleýi tıis bolǵan, ol úshin deklaratsııa tapsyrý mindetti. Saıyp kelgende, tergeýdiń nusqasy boıynsha Seıitqazy Mataev 2011-2015 jyldary 300 mln. teńgeden astam salyq tóleýden jaltarǵan.
Atap aıtarlyǵy, bul jolǵy sot otyrysynda Astana qalalyq sotynyń feldsheri Seıitqazy Mataevtyń densaýlyǵy jóninde mynadaı aqparat berdi: «Búgin saǵat 09.45.-te S. Mataevtyń qan qysymy 220-da 120-ny kórsetti. Al qazir 11.30-da 180-de 105-ti kórsetti. Naýqas fızıotenz dárisin qabyldady. Sonyń áserinen qan qysymy tómendedi». Feldsher oǵan dárini sottyń ústinde emes, otyrys bastalǵanǵa deıin qabyldaýdy usyndy. Al S. Mataevtyń ózi kardıolog dárigerdiń kómegine júgingisi keletinin jetkizdi. Alaıda sotqa tóraǵalyq etýshi sýdıa Aqbolat Qurmantaev ótken aptada birneshe ret S. Mataevqa óz densaýlyǵyna nemquraıdylyqpen qaramaýdy eskertken edi. Máselen, S. Mataev ótken aptanyń beısenbi, juma kúnderi aýrýhanaǵa barmaǵan.
Ámirlan Álimjan
