Mataevtar isi. Kýáger «QazTAG»-tyń shart talaptaryn buzǵanyn aıtty
ASTANA. QazAqparat - «QazTAG» halyqaralyq aqparat agenttigi» JShS-gi memlekettik satyp alý shartynyń talaptaryn buzǵan. Seıitqazy jáne Áset Mataevtardyń ıeligindegi agenttik kún saıyn elimizdegi iske asyrylyp jatqan memlekettik baǵdarlamalar týraly aqparattyq habarlardy ashyq jaǵdaıda oqyrmandarǵa jetkizip otyrýǵa tıis bolǵan. Bul týraly «Mataevtar isi» boıynsha kýágerlerdiń biri, Aqparat jáne muraǵattar komıtetiniń baspa BAQ basqarmasynyń burynǵy jetekshisi Álııa Aıǵarınanyń sotqa bergen jaýabynda aıtyldy. Sotqa qatysa almaýyna oraı Á. Aıǵarınanyń sotqa bergen túsinigin sýdıa Aqbolat Qurmantaev oqyp berdi.
«Anyqtalǵan zań buzýshylyqtardy baıqaǵan soń men istiń aq-qarasyn bilýge birneshe ret tóraǵanyń orynbasary Bek Arpabaev arqyly komıtet basshylyǵyna júgindim. Onda «QazTAG» HAA» JShS-iniń qyzmeti memlekettik satyp alý jónindegi №222 shartynda kórsetilgen talaptarǵa saı kelmeıtinin aıttym. Alaıda Bek Arpabaev «QazTAG»-tyń atqarǵan jumysyn ár aı saıyn sol jibergen kúıinde qabyldaýǵa nusqaý berdi»,- delingen Á. Aıǵarınanyń jaýabynda.
Keıinirekte «QazTAG»-tyń tarapynan bolǵan zań buzýshylyqtar jóninde ol Aqparat jáne muraǵattar komıtetiniń tóraǵasy Bolat Bersebaevty da habardar etedi. Alaıda anyqtalǵan zań buzýshylyqtarǵa qaramastan, tóraǵa da agenttiktiń atqarylǵan jumystar jónindegi aktilerine tezdetip qol qoıyp, qabyldap alýǵa nusqaý beredi. Kýágerdiń aıtýynsha, ol komıtet basshylyǵy bergen nusqaýdy óz erkinen tys bolsa da, oryndaýǵa májbúr bolǵan. «Alaıda komıtet basshylyǵy bergen nusqaýlardy oryndaýǵa májbúr boldym. Sebebi meni qysymǵa alyp, jumystan shyǵarýy nemese jumys isteýge tózbeıtin ahýal týǵyzýy (ondaı jaǵdaıda jumystan ózim de ketemin ǵoı) múmkin edi»,- dep jazypty Á. Aıǵarına.
Aıtarlyǵy, B. Arpabaev ta, B. Bersebaev ta Á. Aıǵarınaǵa nusqaýdy aýyzsha berip otyrǵan. Saıyp kelgende, «QazTAG» HAA» JShS-gi 2010 jyldyń 25-inshi tamyzynda qol qoıylǵan №222 memlekettik satyp alý shartynyń talaptaryn buzǵan. ıAǵnı agenttik aı saıyn qajetti aqparattyq habarlamalardy oqyrmandarǵa jetkizbegen. Buǵan qosa, QazTAG-tyń veb-saıtyndaǵy jańalyqtar aqyly negizde jarııalanǵan. «Bul zańǵa qaıshy keletin is. Óıtkeni memlekettik aqparattyq saıasatty halyqqa ashyq, qoljetimdi jaǵdaıda nasıhattaýǵa memlekettik satyp alý boıynsha bıýdjetten arnaıy qarajat bólinedi»,- dep túsindiredi Á. Aıǵarına. Kýáger óziniń sotqa bergen jaýabynda osyndaı jaǵdaıdyń 2011 jyly da qaıtalanǵanyn aıtady. Ol ótken jylǵydaı www.kaztag.kz saıtyna kirip, jańalyqtar men aqparattyq habarlardyń aqyly negizde jarııalanǵanyn kóredi.
Aıta ketelik, osy epızod boıynsha kýágerler men zardap shekken taraptyń ókiliniń sotqa bergen túsinikterinen keıin sýdıa A. Qurmantaev Seıitqazy jáne Áset Mataevtarǵa sóz kezegin berdi. Biraq olar sotqa qandaı da bir túsinik berýden bas tartty.
Ámirlan Álimjan.
