Mataevtar isi: QazTAG-qa qarajat zańsyz tólendi
ASTANA. QazAqparat - Astanadaǵy №2 Esil aýdandyq sotynda Seıitqazy jáne Áset Mataevtardyń qylmystyq isi boıynsha sot protsesi jalǵasyp jatyr. Bul jolǵy sot otyrysynda Baılanys, aqparattandyrý jáne aqparat komıtetiniń burynǵy laýazymdy qyzmetkerleri sotqa jaýap berdi.
Aıta ketelik, sotqa deıingi tergeý is-sharalarynan anyqtalǵandaı, 2010-2015 jyldar aralyǵynda Seıitqazy Mataev óz uly - «QazTAG HAA» JShS-iniń bas dırektory Áset Mataevpen birlesip aldyn-ala bir top adamdarmen sóz baılasyp, aldaý men senimdi teris maqsatqa paıdalaný jolymen memlekettik satyp alý salasyndaǵy iri kólemdegi bıýdjet qarajatyn jymqyrdy. Urlanǵan aqshanyń kólemi 169 mln. teńgeni quraǵan.
«Men basshylyq etken komıtet 2010 jyly memlekettik aqparattyq saıasatty halyqqa nasıhattaýǵa qyzmetterdi satyp alý úshin konkýrs jarııalady. Júzege asyrylǵan rásimderdiń nátıjesinde 2010 jyly 29-ynshy shildede keıbir lottar boıynsha ótkizilgen konkýrs ótpegen bolyp esepteldi. Óıtkeni oǵan kem degende eki qatysýshy ǵana jiberildi. Al «QazTAG HAA» JShS-i bul konkýrsqa qatysýǵa ótinish bergen joq»,- dep áńgimeledi sotqa bergen jaýabynda kýágerlerdiń biri, Baılanys, aqparattandyrý jáne aqparat komıtetiniń burynǵy tóraǵasy Bolat Bersebaev.
Kýáger sottaǵy sózinde Seıitqazy Mataevtyń ózine paıdakúnemdik qyzyǵýshylyqpen ótinish jasap, QazTAG-pen eki lot boıynsha «bir kózden» qarajat bólýge kelisim-shart jasaýdy usynǵanyn aıtty. «Men Seıitqazy Mataevpen Ulttyq baspasóz klýbynyń Almatydaǵy ǵımaratynda kezdestim. Mataev kelisim-shart jasaýdy surady. Meniń onymen janjaldasýǵa eshqandaı nıetim bolǵan joq. Oǵan qosa QazTAG sııaqty bedeldi agenttiktiń memlekettik aqparattyq saıasatty tıimdi jáne sapaly nasıhattaıtynyna úmit arttym»,- dedi kýáger. Sonymen qatar, ol kelisim-shart jasaýdan bas tartqan jaǵdaıda S. Mataevtyń jeke basyna jáne ózi basqaratyn komıtetke qarsy jaǵymsyz aqparattyq naýqan ótkizýge kirisetininen qaýiptegenin jasyrmaı aıtty.
Saıyp kelgende Bolat Bersebaev óziniń qyzmet babyn paıdalana otyryp, zańsyz sheshim qabyldaıdy. Sonyń nátıjesinde eki lot boıynsha «bir kózden» qarajat bólýge kelisim-shart jasalady. Ol úshin komıtet tóraǵasy óziniń orynbasary Bek Arpabaevqa kelisim-shart jasaýǵa qajetti qujattardy daıyndaýǵa tapsyrma beredi. «Alaıda bul memlekettik satyp alý tártibine qaıshy keletin edi. Óıtkeni «QazTAG HAA» JShS-i atalǵan memlekettik satyp alý konkýrsyna qatysqan joq»,- dep túsindirdi B. Bersebaev. Kýágerdiń aıtýyna qaraǵanda, komıtet QazTAG-qa qarajatty zańsyz tólegenimen, 2010 jyly memlekettik aqparattyq saıasatty nasıhattaý nátıjeleri kóńil kónshitpedi. «QazTAG-tyń qyzmeti tehnıkalyq erekshelikterge saı kelmedi. Mysaly, agenttik kún saıyn 40-50 aqparattyq habarlama jarııaldaýǵa tıis bolǵanymen, ol bir aıda bar-joǵy 100 aqparattyq habarlama shyǵardy. Materıaldar jabyq tártippen jarııalandy»,- dep túsindirdi ol. Bolat Bersebaev sondaı-aq atqarylǵan jumystardyń aktisi tekserilmegenin de jasyrmaı aıtty.
Aıta ketelik, Qazaqstan Respýblıkasy Qylmystyq Kodeksiniń 65-inshi babyan sáıkes, óziniń teris qylyqtaryna ókiný men tergeýge kómektesýine baılanysty Baılanys, aqparattandyrý jáne aqparat komıtetiniń, «Qazaqtelekom» AQ-nyń laýazymdy tulǵalary qylmystyq jaýapkershilikten bosatylǵan bolatyn.
Ámirlan Álimjan
