Mataevtar isi boıynsha tergeý: UBK qyzmet qunyn kótergen
ASTANA. QazAqparat - Seıitqazy Mataevqa tıesili «Ulttyq baspasóz klýby», tergeý nusqasy boıynsha, «Qazaqtelekom» AQ jarnamalyq ónimin ornalastyrý boıynsha kórsetiletin qyzmettiń qunyn ádeıi kóterip otyrǵan, al onyń aıyrmasyn qoldy etip, óziniń jeke qajetine jumsaǵan.
Tergeý Seıitqazy Mataev óziniń bedelin paıdalanyp, «Qazaqtelekom» AQ-nyń strategııalyq basqarý boıynsha bas dırektory Batyr Mahanbetajıevke oǵan kompanııa qyzmeti jóninde habar taratýǵa tender utyp alýda járdemdesýdi surap, ótinishpen júgingenin anyqtady. Seıitqazy Mataevqa tıesili «Ulttyq baspasóz klýby» jarnamalyq materıaldardy ornalastyrýda gazet pen kompanııa arasyndaǵy deldal rólin atqarýy tıis edi.
Budan buryn Batyr Mahanbetajıev óz jaýabynda satyp alý erejesi boıynsha qosalqy merdigerlikke berýdi azaıtý qajettigin rastaǵan. Alaıda ol S. Mataevtyń usynysymen kelisken. Ol óz qyzmetkerlerine barlyǵy tenderlik qujatqa sáıkes kelýi úshin Seıitqazy Mataevqa ótinim jasaýǵa járdemdesýin tapsyrdy. Tergeý anyqtaǵandaı, «Qazaqtelekom» AQ qarajatynan Mataev 143 mln teńge qymqyrǵan.
Osy epızod boıynsha kýáger retinde «Qazaqtelekom» AQ-nyń jurtshylyqpen baılanys qyzmetiniń menedjeri Mádına Shilikbaeva jaýap berdi.
Kýágerdiń aıtýynsha, 2013 jyly «Qazaqtelekom» AQ-nyń «Vremıa» gazetinde jarııalaǵan jarnamalyq materıaldaryn tekserý maqsatynda gazet ókiline telefon soǵyp, elektrondyq mekenjaıǵa materıaldardy jiberýdi suraıdy.
Mádına Shilikbaevanyń aıtýynsha, jarnama-aqparattyq materıaldyń kólemi, gazet nómiri, 1 sharshy sm orynnnyń baǵasy kórsetilgen kesteni oǵan elektrondyq mekenjaıǵa jibergen, bul rette baǵa sharttyń qosymshasynda kórsetilgennen tómen boldy.
Sondaı-aq Mádına Shilikbaeva túrli BAQ ókilderine qońyraý shalyp, olarǵa jarnamalyq-aqparattyq materıaldar ornalastyrýǵa tender ótkizilmegenin, «Qazaqtelekom» AQ týraly materıaldardy gazetter men jýrnaldarǵa ornalastyrýyn, tender ótkizilgennen keıin onyń jeńimpazy qyzmet úshin tóleıtinin túsindirgen. Barlyq BAQ bul shartqa kelisti dese bolady, olar shart jasasqanǵa deıin materıaldardy shyǵardy.
Mádına Shilikbaevanyń aıtqanyn «Qazaqtelekom» AQ-nyń jurtshylyqpen baılanys jónindegi basqa menedjer Záýre Qazybaeva da rastady.
«Shart jobasyn daıyndaý kezinde «UBK» usynǵan baǵany kórsettim de, Isakovany («Qazaqtelekom» AQ-nyń jurtshylyqpen baılanys departamentiniń dırektory) UBK baǵasy baspa BAQ praıs-paraǵynda kórsetilgen baǵadan áldeqaıda joǵary ekenin aıttym», - dedi Z. Qazybaeva.
