Mataev isi boıynsha apellıatsııalyq alqa otyrysy 6 jeltoqsanda ótedi
ASTANA. QazAqparat - Astana sotynyń apellıatsııalyq alqasy Seıitqazy jáne Áset Mataevqa qatysty Astanadaǵy Esil aýdandyq №2 sotynyń úkimine baılanysty appelıatsııalyq shaǵymdy qarastyrýda.
Astana qalasy sotynyń apellıatsııalyq alqasynyń sýdıasy Alma Esimova Mataevtarǵa qatysty apellıatsııalyq alqa otyrysyn 6 jeltoqsanǵa aýystyrdy.
Aıta keteıik, 3 qazanda Astanadaǵy Esil aýdandyq №2 sotynyń sheshimimen, memleket bıýdjetinen iri kólemde aqsha jymqyrdy jáne 300 mln teńge salyqty tóleýden jaltardy dep aıyptalǵan Seıitqazy Mataev 6 jylǵa bas bostandyǵynan aıyrylǵan bolatyn. Al onyń balasy Áset Mataev 5 jylǵa bas bostandyǵynan aıyryldy. Seıitqazy Mataev pen onyń balasy, «KazTAG» HAA bas dırektory Áset Mataev ózara sybaılasa otyryp, 300 mıllıon teńge jymqyrdy dep aıyptalǵan bolatyn. Buǵan qosa, tergeý sharalary Seıitqazy Mataevtyń 327 mln teńge kólemindegi salyqtan jaltaryp júrgenin anyqtaǵan edi.
Seıitqazy Mataev QR QK 177-babynyń 4-bóliminiń B tarmaǵy boıynsha jáne QR QK 245-babynyń 3-bóliminiń, 190-baby, 4- bóliminiń 2-tarmaǵy boıynsha kináli dep tanyldy. Onyń dúnıe-múlki tárkilenip, 6 jylǵa bas bostandyǵynan aıyrý týraly jaza taǵaıyndaldy. Jáne ómir boıyna memlekettik jáne kommertsııalyq uıymdardaǵy uıymdastyrýmen jáne materıaldyq jaýapkershilikpen baılanysty basshylyq qyzmetterdi atqara almaıdy. Áset Mataev ta QR QK 194- baby 4-bólimi, 190-baptyń 4-tarmaǵynda kórsetilgen qylmystar boıynsha kináli dep tanyldy. Atalǵan baptar negizinde «KazTAG» HAA burynǵy basshysynyń dúnıe-múlki tárkilene otyryp, 5 jylǵa bas bostandyǵynan aıyryldy jáne kommertsııalyq uıymdarda uıymdastyrýmen jáne materıaldyq jaýapkershilikpen baılanysty basshylyq qyzmetterdi atqarýǵa tyıym salyndy.
