«Mássaǵan, biz aldandyq!» nemese «aqyrzaman» avtory maııalyqtar ma?» - BAQ-qa sholý
***
«Egemen Qazaqstan» gazetiniń jazýynsha, Qazaqstannyń Túrkııadaǵy elshiligi osy eldiń «ÝSAK» Strategııalyq zertteýler ortalyǵymen birlesip, «dóńgelek ústel» uıymdastyrdy. Onda túrik sarapshylary elshilik túrik tiline aýdarǵan Qazaqstan Respýblıkasynyń Prezıdenti N.Nazarbaevtyń «Qazaqstan-2050» Strategııasy - qalyptasqan memlekettiń jańa saıası baǵyty» atty Qazaqstan halqyna Joldaýynyń negizgi basymdyqtarymen, Memleket basshysynyń «G-Global» bastamasy tanystyryldy. «N.Nazarbaevtyń arqasynda Qazaqstan myǵym, básekege qabiletti memleket retinde aıaqqa turdy. Osynysymen de Qazaqstan Prezıdenti usynǵan eldiń 2050 jylǵa deıingi damý strategııasy Qazaqstan úshin ǵana emes, búkil álem úshin de mańyzdy bolyp tabylady», - dep atap ótken Ortalyq sarapshylary. Aqparat «Túrik sarapshylary Memleket basshysynyń «Qazaqstan - 2050» Strategııasy Joldaýyn joǵary baǵalady» degen taqyryppen berilgen.
«Ońtústik Qazaqstan oblysy aýmaǵynda shekarashylar ushaǵynyń apatqa urynýynyń sebepteri men saldaryn anyqtaý maqsatynda áskerı prokýratýra, táýelsiz sarapshylar jáne Ulttyq qaýipsizdik komıteti tarapynan úsh birdeı komıssııa quryldy. Oqıǵa ornyna shuǵyl jetken Ulttyq qaýipsizdik komıtetiniń tóraǵasy Nurtaı Ábiqaev marqum bolǵan áskerılerdiń otbasymen kezdesti», - dep jazady «Egemen Qazaqstan» búgingi sanyndaǵy «Apat jaǵdaıy tekserilip jatyr» degen taqyryptaǵy maqalasynda. «Apat oryn alǵan oryndy baryp óz kózimmen kórdim. Qaza tapqandardyń týǵan-týystarymen jolyǵyp, Elbasynyń jáne ózimniń atymnan kóńil aıttym. Barlyq qaza tapqan baýyrlarymyz bizdiń áskerı dostarymyz. Sońǵy saparǵa shyǵaryp salý jumysyn uıymdastyramyz. Úkimettiń atynan olardyń otbasylaryna kerekti kómekter jasalady», - dedi N. Ábiqaev.
***
Málimnen góri beımálimge sengish, kórinetinnen góri kómeskige qumar adam balasy Ulý jylyn úlken úmitpen qarsy alyp, úreıli úderispen shyǵaryp saldy dese bolǵandaı. Úreıli úderis dep otyrǵanymyz - «21.12. 2012» degen sandar tizbegine qatysty «Aqyrzaman» aıtysy. «Bolady-bolmaıdy, sónedi-sónbeıdi, tónedi, tónbeıdi» - qyp-qyzyl aıtys, qyzylkeńirdek emeı nemene, shyndyǵynda, ol anaý-mynaý emes, alty mıllıardtyń alaýyzdyǵyna alyp kelse... Kún sóne qalsa, aspannan tas tóne qalsa degen qorqynyshtan qolyna shyraǵdanyn ustap, azyq-túlik toly qorjynyn arqalaǵan alty mıllıardtyń teń jartysy jandalbasalap, sál bolmaǵanda jumyr Jerdi tastap qashýǵa ázir bolǵany da ótirik emes. Sonyń bári bir ǵana «Maııa kúntizbesiniń» kesiri. Bul jaıynda molynan maǵlumat alǵyńyz kelse, «Alash aınasy» gazetindegi «Mássaǵan, biz aldandyq!» nemese «aqyrzaman» avtory maııalyqtar ma?» degen taqyryptaǵy maqalaǵa nazar salyńyz.
Grıgorıı kúntizbesi boıynsha toılanatyn Jańa jyldy búginde búkil álem bolyp qarsy alý úrdiske endi. Qazaq eli de jahannyń kóshinen qalmaı 31 jeltoqsan kúni túnde Jańa jyldyń kelýin kútedi. Bir ǵasyr boıy Jańa jyldy toılaýdyń ózindik dástúri ómirimizge endi. Biraq qoldanystaǵy kúntizbeniń basy sanalatyn bul meıramdy eýropalyq emes, qazaqy sıpatynda toılaı alyp júrmiz be? Eýropalyq negizdegi merekeni qazaqtyń tól meıramyna aınaldyrýdyń joldary qandaı? Mine dál osy saýaldar «Alash aınasy» gazetiniń turaqty «Oı-kókpar» aıdarynda mamandar talqysyna túsken. Taqyryby - «Jańa jyldy toılaýdyń qazaqy úlgisin dástúrge engize aldyq pa?»
***
«Memleket basshysy Nursultan Nazarbaev Shymkent qalasynyń mańynda áskerı-kólik ushaǵynyń apatqa ushyraýyna baılanysty memlekettik jáne quqyq qorǵaý organdarynyń basshylarymen keńes ótkizdi», - dep jazady «Kazahstanskaıa pravda» gazeti. Basylymnyń atap ótýinshe, Qazaqstan Prezıdenti áýe apatynyń barlyq jaı-japsary jan-jaqty zertteletinin atap ótti. «Qyzmettik tekseris júrgizý úshin arnaıy top quryldy. «Qara jáshikti» ashqannan keıin biz qaıǵyly oqıǵanyń mán-jaıyn tolyq biletin bolamyz. Aldyn-ala málimetter boıynsha, eshqandaı jat nıetti syrtqy áserler bolmaǵan dep aıtýymyzǵa bolady. Bul túrli jaǵdaılardyń saldary dep esepteımin. Sol kúni Shymkent mańynda aýa raıy óte qubylmaly boldy, soǵan qaramastan ekıpaj ushaqty qondyrýǵa tyrysqan. Qaladan 40 shaqyrym mańda ushaq radardan joǵalyp ketken. Ushqysh tájirıbeli edi, ushaq jaramdy jaǵdaıda bolǵan, josparly jóndeýden ótkizilgen. Degenmen, oqıǵanyń barlyq mán-jaıy, apatqa ushyraý sebepteri biz júrgizip otyrǵan tolyq tekseristen keıin naqty belgili bolady», - dedi Memleket basshysy.
